/ Nga: Dashnim HEBIBI, Prishtinë/
E shtuna, ndonëse për shumëkënd është ditë pushimi, këtë herë ishte një ditë pune dhe përkushtimi për Dr. Dergut Aliun. Ai, përkundër angazhimeve edhe të shtunën që do të duhej të jetë në Tiranë për disa pacientë ai gjeti kohë për të mirëpritur në Spitalin “Lindja” një mysafir të veçantë – Prof. Dr. Xhavit Lipajn, mjek, shkencëtar dhe një ndër personalitetet më të njohura shqiptare në fushën e mjekësisë në Zvicër i shoqëruar nga bashkëshortja e tij. Bashkë me ta ishte i pranishëm edhe kryeredaktori i qendrës mediale me qendër në Dietikon sam24.info, PhD Dashnim Hebibi, i cili dëshmoi një bashkëbisedim frymëzues mes dy figurave të respektuara.
Prof. Dr. Lipaj ndodhet në Kosovë me rastin e 26-vjetorit të ndarjes nga jeta të nënës së tij dhe disa familjarëve të tjerë më 13 prill 1999 – një sakrificë e paharrueshme që jeton në kujtesën e Dardanisë së re. Kjo vizitë, përveç aspektit emocional e përkujtimor, u shndërrua edhe në një moment reflektimi dhe diskutimi mbi nevojat jetike të sistemit shëndetësor në Kosovë.
Përvoja zvicerane si model për zhvillimin e Kosovës
Një nga temat kryesore të këtij takimi ishte mundësia e sjelljes së përvojës dhe standardeve zvicerane në fushën e kujdesit ndaj të moshuarve në Kosovë. Prof. Lipaj është drejtues i një prej qendrave më të avancuara për senioret në Andermatt të Zvicrës – një institucion shembull në trajtimin e sëmundjes së Alzheimerit dhe demencës, me staf të specializuar, infrastrukturë moderne dhe qasje humane ndaj pacientëve.
Ai theksoi se një qendër e tillë është më se e domosdoshme edhe në Kosovë, ku popullsia e moshuar po rritet, ndërsa kapacitetet për t’u kujdesur në mënyrë dinjitoze për ta janë ende të kufizuara. “Kosova meriton të ketë institucione që ofrojnë trajtim me dinjitet për të moshuarit, njësoj si në Zvicër. Ne kemi njohurinë, kemi përvojën, kemi përkushtimin – na duhet vetëm vullneti dhe përkrahja për ta bërë realitet,” u shpreh Prof. Lipaj.
Në këtë drejtim, bashkëpunimi me profesionistë si Dr. Dergut Aliu, i cili udhëheq njërin prej spitaleve më të suksesshme të gjinekologjisë në Kosovë, është i një rëndësie të madhe. Ata ndajnë të njëjtin vizion: modernizimin e sistemit shëndetësor përmes iniciativave konkrete, standardeve të larta dhe ngritjes së kapaciteteve profesionale.
Roli i mërgatës dhe domosdoshmëria e mbështetjes shtetërore
Ky takim është një kujtesë e fuqishme se mërgata shqiptare nuk është vetëm burim financiar për Kosovën, por edhe një thesar i paçmuar i dijeve dhe përvojës. Personalitete si Prof. Dr. Lipaj janë të gatshëm të kontribuojnë aktivisht në zhvillimin e vendit, duke sjellë praktika moderne e të suksesshme nga vendet ku kanë ndërtuar karrierat e tyre.
Mirëpo, për të realizuar projekte të tilla madhore, nevojitet edhe përkrahja e shtetit – në nivel institucional, ligjor dhe financiar. Vetëm atëherë iniciativat individuale mund të shndërrohen në projekte të qëndrueshme e transformuese për sistemin shëndetësor të vendit.
Një mëngjes frymëzues, një fillim i mbarë
Takimi i së shtunës mes dy profesionistëve të njohur ishte më shumë se një bisedë miqësore – ishte një takim me vizion, me ide dhe me besim se gjërat mund të ndryshojnë për të mirë. PhD Dashnim Hebibi, që përcolli nga afër këtë bashkëbisedim, u shpreh i entuziazmuar nga përkushtimi dhe vullneti i dy mjekëve për t’i dhënë Kosovës një shembull tjetër të suksesit.
Dita filloi mbarë – me një kafe mëngjesi mes miqsh, por mbi të gjitha mes profesionistësh që duan të bëjnë ndryshimin. Dhe siç thuhet, kur ka vullnet dhe dije, çdo gjë është e mundur.
SAM24.info