/ Nga: Dashnim HEBIBI /
Uster, 31 maj 2025 – Në një atmosferë të ngrohtë dhe vëllazërore, Shoqata “Gjergj Kastrioti” – Zvicër organizoi një takim falënderues me anëtarët, bashkëpunëtorët dhe sponsorët e manifestimit “Gjergji në Art”, i cili u mbajt me rastin e datëlindjes së heroit tonë kombëtar, Gjergj Kastrioti Skënderbeu.
Ky takim unik u zhvillua në adresën Berchtoldstrasse 10, në qytetin e Usterit, dhe kishte për qëllim jo vetëm falënderimin për të gjithë ata që dhanë kontribut në organizimin e këtij manifestimi kulturor e artistik, por edhe një analizë të përbashkët mbi rrjedhën e ekspozitës, për të nxjerrë mësime e për të përgatitur një edicion edhe më të suksesshëm vitin e ardhshëm.
Një qasje e tillë – që një shoqatë pas përfundimit të një manifestimi të organizojë një takim falënderimi me koktej, reflektim dhe hapësirë për sugjerime – është ndër të rrallat që kemi parë në diasporë.
Kryetari i shoqatës, z. Agim Pepaj, falënderoi të gjithë të pranishmit për bashkëpunimin e sinqertë dhe përkushtimin e treguar në çdo hap të organizimit. Ai theksoi rëndësinë e ruajtjes së traditës, të vlerësimit reciprok dhe të mos harrimit të atyre që ndihmojnë pas përfundimit të një ngjarjeje.
Në takim ishin prezentë: Sevi Bajraliu (arkatar), Jeton Lleshi, Tonin Nikolli, Hyra Bajraliu, Arben Rexhepi, Rini Dauti, Avni Gallapeni, Ardita Pepaj, Leke Velaj, Jeton Bajraliaj, Ardiana Velaj, Aferdita Pepaj, Marjana dhe Valerjana Gjuraj, si dhe shumë të tjerë që kanë dhënë kontribut në organizim.
Secili që kishte dëshirë të shprehej e pati mundësinë, duke krijuar një klimë respekti, transparence dhe vlerësimi të ndërsjellë. Fjalët e mira, por edhe vërejtjet konstruktive, u mirëpritën me qëllim që puna e përbashkët të ecë drejt përmirësimit.
Ne nuk jemi nga ata që, pasi përfundojmë një manifestim, i harrojmë ata që na ndihmuan. Mirënjohja duhet të jetë pjesë e pandashme e çdo veprimi që e patëm”, u shprehë kryesia dhe anëtarët e shoqatës.
Takimi u bë edhe më i veçantë me praninë simbolike të përkrenares së Skënderbeut, e cila ngjalli emocione të forta, veçanërisht tek fëmijët e mërgatës, që patën mundësinë të përjetojnë nga afër historinë dhe trashëgiminë tonë kulturore.
Të gjithë të pranishmit u ndanë të kënaqur nga kjo mbrëmje plot frymëzim dhe u zotuan që vitin e ardhshëm të kthehen me ide dhe projekte edhe më të mëdha.
Ky takim mbetet një shembull për t’u ndjekur nga të gjitha shoqatat shqiptare në diasporë – jo vetëm për organizimin e ngjarjeve, por edhe për mënyrën si vlerësohet çdo individ që jep kontribut.
Takimi i 31 majit ishte një shembull frymëzues për komunitetin shqiptar në Zvicër, duke dëshmuar se puna e mirë kolektive jo vetëm që vlerësohet, por edhe kultivohet përmes mirënjohjes dhe bashkëpunimit të vazhdueshëm.
Kryesia e shoqatës, me përkushtim të jashtëzakonshëm jo vetëm organizuan ekspozitën “Gjergji në Art”, por edhe vazhdojnë të punojnë pa u lodhur për ruajtjen dhe promovimin e kulturës shqiptare në Zvicër.
Shoqata në fjalë meriton respekt të veçantë për punën dhe përkushtimin që kanë treguar dhe po tregojnë në vazhdimësi. ( Fotografitë nga kryesia e shoqatës)