Swiss International Air Lines, pjesë e Lufthansa Group, ka zbuluar dizajnin e ri luksoz të kabinave për fluturimet ndërkontinentale, që do të fillojë të aplikohet nga tetori i vitit 2025. Nën konceptin e ri “Swiss Senses”, pasagjerët e klasës së parë do të udhëtojnë në suita private me dyer rrëshqitëse, duke ofruar një nivel të ri të privatësisë dhe rehatisë në qiell.
Debutim në Airbus A350-900
Suita të reja do të prezantohen fillimisht në avionin Airbus A350-900 dhe më pas do të pasojnë modernizimet në flotën ekzistuese të Airbus A330 dhe Boeing 777.
Çfarë ofron suita e re në First Class?
Suitat e reja të Swiss do të përfshijnë:
- Krevate me gjatësi 2,05 metra
- Mure ndarëse me lartësi 1,80 metra
- Karrige me gjerësi deri në 117 cm
- Ekran personal 43 inç
- Funksion ngrohjeje dhe ftohjeje të sediljes
- Karikim pa kabllo dhe lidhje Bluetooth
- Gardërobë personale dhe tavolinë ngrënieje
- Butonin “Mos më shqetëso” për qetësi maksimale
Risi edhe për Business dhe Economy Class
Edhe udhëtarët në Business Class do të përfitojnë nga dizajni i ri, me mundësinë për të zgjedhur lloje të ndryshme ulësesh – nga ato me privatësi të lartë deri te ulëset më të hapura me lëvizshmëri më të madhe. Gjatësia maksimale e shtrirjes në Business Class do të arrijë deri në 2,20 metra.
Në Economy Class, përmirësimet përfshijnë batanije dhe jastëkë të rinj, si dhe një aromë freskuese të re me emrin “Alpine Valley”, për një përvojë më të këndshme gjatë fluturimit.
Çmimet ende të panjohura
Swiss nuk ka dhënë ende informacion për çmimet e reja, por me “Swiss Senses”, kompania po vendos standarde të reja jo vetëm në dizajnin e sediljeve, por në të gjithë përvojën e udhëtimit – nga teknologjia, te estetika dhe ndjesia e luksit, shkruan 20min.ch, transmeton sam24.info