Jusuf Buxhovi, shkrimtar e historian është nderuar në Gjilan me çmimin e madh për letërsi, “Beqir Musliu” Për kontributin e jashtëzakonshëm në letërsi. Kryetari i kësaj komune Alban Hyseni tha se Buxhovi iu bashkua figurave të shquara që morën këtë çmim.
Vetë Buxhovi, tha se ndihet shumë i nderuar dhe emocionuar për këtë çmim, sepse i takon brezit letrar të “Beqir Musliut”. Ai tha se çmimi letrar “Beqir Musliu” duhet të ruhet, sepse nuk është vetëm i Gjilanit, por i gjithë letërsisë shqipe. “Mendoj se është njëri ndër çmimet më të rëndësishme që jepet sot në përgjithësi dhe jam i nderuar që jam bartës i këtij çmimi”, tha Buxhovi. Kryetari i Komunës së Gjilanit Alban Hyseni e quajti nder dhe privilegj të veçantë që pas dhënies së çmimit për figurën e madhe të letërsisë së kombit, të ndjerit Ismail Kadare, tashmë i bashkohet figurave të shquara të letërsisë, krijuesve dhe studiuesve shqiptar me dhënien e këtij çmimi edhe fituesi Jusuf Buxhovi.“Mund edhe të kuptojmë arsyet e përzgjedhjes së fituesit të çmimit “Beqir Musliu” për këtë vit. Urime për çmimin dhe faleminderit që jeni pjesë e listës së fituesve të çmimit të të madhit dhe ky çmim duhet të jetë pjesë e shpalljes për çdo vit dhe të pasurohet Gjilani me listën e fituesve të tjerë”, tha kryetari Hyseni, njofton rtk.
