Teatri Kombëtar i Kukullave, në bashkëpunim me Teatrin e Diasporës ka realizuar 5 shfaqje me kukulla, për fëmijët e diasporës në Shtetet e Bashkuara të Amerikës.
Drejtoresha e Qendrës Kombëtare të Kulturës për fëmijë, Melsi Qirici, në një postim online, e vlerësoi këtë bashkëpunim si, një kapitull te ri të krenarisë sonë kombëtare.
Nga bashkëpunimi mes këtyre dy institucioneve përfituan fëmijët shqiptarë që po rriten larg atdheut. Mijëra kilometra larg Shqipërisë, ata panë shfaqje në gjuhën amtare. Shfaqjet ngjallën emocione si dhe patën një jehonë tek komuniteti shqiptar atje, por edhe në media.
Gazeta “Dielli” shkroi: “Shfaqjet e Teatrit Kombëtar të Kukullave në Nju Jork hapin siparin e vitit të ri shkollor dhe mundësinë e një bashkëpunimi me perspektivë”.
Këto shfaqje përkonin me një moment historik për komunitetin shqiptar, përfshirjen e gjuhës shqipe në komunikimet zyrtare të shkollave publike të Nju Jorkut.
“Vatra” e Boston-it shkroi se ky është një rast i rrallë dhe i paharrueshëm për fëmijët shqiptarë që të shohin shfaqje artistike në gjuhën amtare dhe të lidhen më shumë me kulturën tonë.
Drejtoresha e QKKF vlerësoi veçanërisht artistet Klaudia Hila, Esmeralda Kame dhe Ermonela Alikaj, të cilat përfaqësuan me dinjitet dhe pasion teatrin shqiptar në skenat e Amerikës.