Me fillimin e sezonit të pushimeve verore, shumë bashkatdhetarë nga diaspora kthehen për të kaluar verën në Maqedoninë e Veriut. Ky moment shërben si një mundësi për të rikujtuar lidhjet e forta mes atdheut dhe individëve që, edhe pse jetojnë larg, vazhdojnë të kontribuojnë në forcimin e kulturës dhe identitetit tonë. Me këtë rast, Ambasada e Maqedonisë së Veriut në Bernë ka përgatitur një mesazh të veçantë nga Ambasadori, Shkëlqesia e ij, z. Rexhep Demiri për të përshëndetur bashkatdhetarët tanë, duke i falënderuar për përkushtimin dhe lidhjen e tyre të thellë me atdhenë.
“Udhëtoni me gëzim dhe siguri! Rrugë të mbarë dhe shpirt të lehtë, që çdo moment i pushimeve tuaja të jetë i mbushur me harmoni, qetësi dhe përvoja të paharrueshme. Gëzoni çdo çast në vendlindje dhe kthehuni me energji të reja dhe zemër të mbushur me dashuri për atdheun”, tha ndër të tjera z.Demiri.
Fjala e plotë e Ambasadorit:
Të nderuar bashkatdhetarë,
Të dashur miq të diasporës sonë në Zvicër dhe më gjerë,
Me rastin e fillimit të sezonit të pushimeve verore, dëshiroj t’ju drejtohem me një përshëndetje të ngrohtë dhe mirënjohje të thellë për lidhjen tuaj të palëkundur me vendlindjen.
Çdo verë, kthimi juaj në Maqedoninë e Veriut – në qytetet, fshatrat dhe trojet tuaja – nuk është thjesht një udhëtim fizik. Është një rikthim shpirtëror, një dëshmi e dashurisë që ruani për atdheun, për familjen dhe për traditat tona të çmuara.
Ju jeni ura e gjallë që lidh kulturat, ekonomitë dhe zemrat tona. Kontributi juaj – qoftë përmes punës suaj të palodhshme jashtë vendit, përkushtimit ndaj ruajtjes së gjuhës dhe identitetit, apo pjesëmarrjes aktive në jetën shoqërore dhe kulturore – është i paçmueshëm për të ardhmen e përbashkët që ndërtojmë.
Në emër të Ambasadës së Maqedonisë së Veriut në Bernë, ju uroj udhëtim të mbarë dhe pushime të mbushura me qetësi, gëzim familjar dhe përjetime të paharrueshme në vendlindje. Ju presim të ktheheni me zemrat e mbushura e me forca të reja, ashtu siç gjithmonë na nderoni me prezencën tuaj.
Me respekt dhe përzemërsi,
Rexhep Demiri
Ambasador i Maqedonisë së Veriut në Zvicër
Bernë, Korrik 2025
SAM24.info