Në kuadër të konferencës rajonale “Përshpejtimi i Reformave të Kujdesit për Fëmijët drejt Anëtarësimit në Bashkimin Europian”, Kryeministri Edi Rama ka theksuar rëndësinë e garancisë europiane për fëmijët si një iniciativë të jashtëzakonshme për përmirësimin e kushteve të jetesës dhe mbrojtjen e të drejtave të fëmijëve në rajonin e Ballkanit Perëndimor. Rama e vlerësoi këtë nismë të BE-së si një mjet kyç që, sipas tij, e thekson solidaritetin dhe angazhimin e përbashkët të shteteve të rajonit për të siguruar mundësi të barabarta për çdo fëmijë.
“Garancia europiane për fëmijët është një nismë e BE-së që, edhe vetëm si një iniciativë, do të mjaftonte për të dhënë një përgjigje të qartë për atë çfarë do të thotë të jesh pjesë e familjes europiane. Ky program ka në qendër të tij të drejtat e fëmijëve dhe siguron mundësi për të gjithë ata për të pasur një shans të barabartë në jetë, pa marrë parasysh kushte fillestare,” – u shpreh Kryeministri.
Ai gjithashtu theksoi se përmes kësaj nisme, BE synon të sigurojë akses në arsimin cilësor, shëndetësinë falas, strehim të përshtatshëm dhe mbrojtje të dedikuar për fëmijët me aftësi të veçanta, si dhe të ndihmojë në përmirësimin e kushteve sociale dhe ekonomike për fëmijët e rajonit.
Gonzato: Investimi te rinia, prioritet për integrimin e Ballkanit Perëndimor në BE
Ambasadori i Bashkimit Europian në Shqipëri, Silvio Gonzato, theksoi rëndësinë e investimit në rininë dhe mbrojtjen e të drejtave të fëmijëve si një nga prioritetet kryesore për përparimin e rajonit dhe integrimin në BE.
Gonzato theksoi se rajoni vazhdon të përballet me sfida të mëdha, përfshirë largimin e trurit dhe pabarazitë sociale, por kërkesa për më shumë angazhim në fushat e shëndetësisë, arsimit dhe zhvillimit profesional është më e madhe se kurrë. Ai deklaroi se një nga objektivat kryesore të Bashkimit Europian është ulja e varfërisë dhe përjashtimit social, me një synim të qartë që deri në vitin 2030 të reduktohet numri i personave në rrezik varfërie dhe përjashtimi social për të paktën 15 milionë individë, përfshirë 5 milionë fëmijë.
“Shqipëria dhe rajoni duhet të investojnë më shumë në të rinjtë e tyre, duke siguruar që ata të kenë mundësi të barabarta për shëndetësi dhe arsimin cilësor, si dhe mundësi për zhvillim të qëndrueshëm dhe integrim të lehtë në tregun e punës,” – tha Gonzato, duke theksuar se ky investim është thelbësor për një zhvillim më të qëndrueshëm dhe përgatitjen e rinisë për të kontribuar në jetën shoqërore dhe ekonomike.
Ministrja Koçiu: Mbështetje e vazhdueshme për fëmijët
Ministrja e Shëndetësisë Albana Koçiu, në fjalën e saj theksoi rëndësinë e Shqipërisë si një nga vendet që ka implementuar rekomandimet e BE-së për mbrojtjen e fëmijëve. Ajo informoi se aktualisht 62 mijë fëmijë mbështeten nga skemat e ndihmës ekonomike dhe se ka një angazhim të fortë për t’i ofruar atyre shërbime shëndetësore dhe arsimore cilësore.
“Pamundësia ekonomike nuk duhet të jetë një barrierë për fëmijët që të rriten në kushte të shëndetshme dhe të kenë mundësi të barabarta për zhvillim,” – shtoi Ministrja Koçiu.
Në përmbyllje, Ministrja Koçiu dhe Ambasadori Gonzato riafirmuan angazhimin për të përshpejtuar reformat e kujdesit për fëmijët dhe rininë, me shpresën se investimi në ta do të sjellë zhvillim më të qëndrueshëm dhe përfitime për të gjithë rajonin, njofton rtsh.