“Shpresoj që Trump të jetë një sinjal alarmi, që Europa të ndryshojë dhe të jetë më realiste për sfidat që e presin,” u shpreh kryeministri Edi Rama në një intervistë për gazetën spanjolle “El Mundo”.
Në intervistën me medien spanjolle, Rama komentoi zhvillimet ndërkombëtare, duke dhënë qëndrimin e tij mbi marrëveshjen me Italinë për emigrantët, impaktin që do ketë bllokimi i fondeve amerikane për vendet e tjera, zgjedhjet në Kosovë dhe vendimi për të ndaluar përdorimin e rrjetit social TikTok në vend.
Kreu i qeverisë ndodhet në Madrid prej ditës së premte (7 shkurt) për të prezantuar edicionin e 30-të të Kongresit Botëror të Drejtësisë, që pritet të organizohet në Tiranë në vitin 2027. Ai u prit gjithashtu nga Mbreti Felipe VI.
Pjesë nga intervista
Vendimi i presidentit amerikan për mbylljen e agjencisë përgjegjëse për ndihmat ndërkombëtare (USAID) dhe pezullimi i zhvendosjes së refugjatëve afganë. Si do ta përballojë Shqipëria?
Me refugjatët afganë të jetosh në Shqipëri nuk do të jetë problem. Nëse dëshirojnë ata do të mund të qëndrojnë në vendin tonë, por nuk mund të kthehen tek vendi i tyre dhe të ndalojnë dhunën. Ata nuk janë as shumë në numër, vetëm disa qindra njerëz.
Drejtësia italiane pothuajse ka paralizuar marrëveshjen e emigracionit të vendit tuaj me Italinë dhe Gjykata e Drejtësisë e BE-së do të vendosë së shpejti për vendet e sigurta. A i besoni të ardhmes së këtij plani?
Duhet të pyes italianët. Nuk më takon mua të them se çfarë do të ndodhë. Ne e nënshkruam marrëveshjen dhe është Italia ajo që e zbaton, sepse ne nuk jemi pjesë. Thjesht ne përgjigjemi kur fqinji ynë na kërkon ndihmë. Evropë duhet të fillojë një politikë të përbashkët emigracioni, për të shmangur përdorimin e tij për qëllime politike dhe për të mbrojtur kontrollin kufitar, por edhe të hapet ndaj emigracionit të ligjshëm.
Shqipëria ka një marrëdhënie vëllazërore me Kosovën, e cila nesër mban zgjedhjet parlamentare. Cila mendoni se do të jetë e ardhmja e territorit?
Kosova është një vend demokratik, me shumë gjallëri dhe shumë i larmishëm. Dhe, si të gjitha vendet e Ballkanit, lufton me gjithë pasionin dhe zhurmën e tepërt, por kjo është gjë e mirë. Unë dua që ata të bëjnë mirë, por nuk kam preferenca për rezultatet e zgjedhjeve. Unë jam një mik dhe ju respektoj të gjithëve. Ju uroj më të mirat me vendimin që marrin kosovarët.
Në Serbi, presidenti Vuçiç është përballur me protesta studentore për tre muaj dhe kryeministri dha dorëheqjen javën e kaluar. Cili është mendimi juaj për atë që po ndodh?
Problemi që kam me opozitën serbe, pa hyrë në dinamikën e politikës së brendshme, është që ata nuk duket të jenë më proevropianë apo properëndimorë se presidenti. Sa i përket Kosovës, ata nuk duket të jenë as më progresivë. Sa i përket pjesës tjetër, nuk është vendi im të komentoj asgjë, sepse është çështje e brendshme e Serbisë. Por besoj dhe uroj që në fund të mbizotërojë dialogu. Sepse marrja me forcë e një qeverie nuk duhet të ndodhë kurrë në tokën evropiane.
Si po përparojnë negociatat për hyrjen e Shqipërisë në BE?
Negociatat me BE-në po shkojnë shumë mirë, ne po punojmë shumë për ta arritur atë. Ne kemi një plan shumë ambicioz së bashku me Komisionin Evropian deri në vitin 2027 për të çuar përpara pjesën politike dhe, nëse gjithçka shkon siç është planifikuar, gjë që nuk është e lehtë të thuhet në këto kohë kur diçka ndodh çdo ditë, Shqipëria mund të jetë anëtare e BE-së në vitin 2030.
A e shihni integrimin më afër se një vit më parë?
Është më afër që kur Vladimir Putin vendosi të pushtojë Ukrainën, sepse, për fat të keq, miqtë tanë në Bruksel dhe në kryeqytetet evropiane, u detyruan të zgjohen në këtë mënyrë. Shpresoj që Trump të jetë një tjetër sinjal alarmi, që Evropa të ndryshojë dhe të jetë më realiste për sfidat dhe kohën: ajo të mos shtyjë ndryshimin e vet, sepse përndryshe do të nënkuptonte fundin e Evropës.
Mendoni se ju lëndon fakti që anëtarësimi i ardhshëm i Ballkanit në BE shihet si bllok?
Nuk funksionon kështu, sepse negociatat bazohen në merita dhe këto janë të pandashme. Çdo vend duhet të plotësojë kriteret dhe secili ka shpejtësinë, aftësitë dhe agjendën e vet.
Një muaj më parë vendosët të pezulloni rrjetin social kinez TikTok në vend për një vit. Për çfarë ishte kjo masë? A po shihni tashmë rezultatet e para që prisnit?
TikTok po tregohet shumë toksik, veçanërisht për fëmijët, dhe 95% e prindërve në Shqipëri janë të tmerruar. Pezullimi ende nuk ka qenë i mundur. Vlerësojmë se do të bëhet brenda pak ditësh. Me ta po flasim edhe në mënyrë konstruktive. U befasova nga gatishmëria e tyre për të adresuar shqetësimet tona. Ai do të mbyllet dhe do të rihapet për sa kohë që TikTok do të plotësojë të gjitha kërkesat tona, njofton rtsh.