Sot fillon një kapitull i ri për Pejën dhe komunat e Dukagjinit, me nënshkrimin e marrëveshjes për ndërtimin e Inkubatorit të Biznesit në kampusin e Universitetit “Haxhi Zeka” në Pejë. Ky projekt përfaqëson një hap të rëndësishëm drejt krijimit të mundësive të reja për të rinjtë dhe zhvillimin ekonomik të rajonit, duke ofruar një hapësirë moderne për ide inovative, bashkëpunim dhe ndërmarrësi.
Ky projekt vizionar, rezultat i bashkëpunimit ndërmjet Ministrisë së Industrisë, Ndërmarrësisë dhe Tregtisë dhe Komunës së Pejës, synon të krijojë një hapësirë moderne ku idetë marrin jetë, kurajoja shpërblehet, dhe e ardhmja ndërtohet me pasion.
Me një investim të përbashkët prej 3,408,822.50 euro, ku Ministria do të kontribuojë me deri në 3,200,000 euro për periudhën 2025–2027, ky inkubator nuk është thjesht një ndërtesë — është një mundësi reale për çdo të ri që ka një ide dhe dëshirë për të ndryshuar botën.
Universiteti “Haxhi Zeka” do të jetë zemra e këtij projekti transformues, duke luajtur një rol kyç në lidhjen mes dijes akademike dhe botës së biznesit. Përfshirja e universitetit “Haxhi Zeka” është thelbësore për suksesin e inkubatorit. Studentët dhe të diplomuarit do të kenë mundësinë të kalojnë nga teoria në praktikë, të zhvillojnë idetë e tyre, të eksperimentojnë, dhe të rriten në një ambient që i mbështet, i sfidon dhe i inspiron. Në këtë hapësirë të re, ata do të formësohen si profesionistë dhe liderë të së ardhmes, të gatshëm të ndikojnë pozitivisht në zhvillimin ekonomik dhe shoqëror të rajonit.
Inkubatori i Biznesit do të jetë një qendër e inovacionit, digjitalizimit, krijimtarisë dhe rritjes ekonomike, duke hapur rrugën për biznese të reja dhe ide që do të ndryshojnë rajonin dhe më gjerë.
Marrëveshja u nënshkrua nga ministrja Rozeta Hajdari dhe kryetari i Komunës së Pejës, Gazmend Muhaxheri, në prani të rektorit të Universitetit “Haxhi Zeka”, prof. dr. Armand Krasniqi, dhe drejtorit për Zhvillim Ekonomik të Komunës së Pejës, z. Nasret Hajrizi./UHZ.EU