Winterthur, 25 Maj 2025 – Në Winterthur të Zvicrës, e diela e fundit e muajit maj u shënua nga një ngjarje kulturore me rëndësi të veçantë: promovimi i dy librave të autorit PhD. Dashnim Hebibi, kushtuar gruas shqiptare të diasporës.
Në një sallë të mbushur plot me mbi 190 pjesëmarrës nga të gjitha trojet shqiptare, u zhvillua një aktivitet i veçantë, ku për herë të rrallë, pjesëmarrja e grave dominonte në numër dhe në përfaqësim. Eventi ishte më shumë se një promovim libri – ishte një homazh publik dhe i thellë ndaj rolit të gruas shqiptare në emigracion, kontributit të saj në familje, në ruajtjen e kulturës dhe në integrimin shoqëror.
Nën sfondin e flamurit shqiptar dhe atij zviceran, të dy vëllimet e librit “Gratë Frymëzuese të Diasporës Shqiptare” u prezantuan nga vetë autori Dashnim Hebibi, një emër tashmë i njohur në radhët e mërgatës shqiptare për angazhimin e tij të vazhdueshëm kombëtar dhe kulturor.
Programi u karakterizua nga një rrjedhë emocionale dhe një përmbajtje domethënëse. U hap me himnin kombëtar të interpretuar live nga zonja Bajrami dhe vijoi me këngë nga kori i grave “Lyra”, fjalë përshëndetëse nga përfaqësues diplomatikë, figura të njohura të diasporës dhe interpretim muzikor nga vëllezërit Kuqi – model i rinisë shqiptare.
Në fjalimet e mbajtura u theksua roli jetik i gruas shqiptare në ruajtjen e identitetit kombëtar. “Të drejtat e njeriut janë të drejta të grave, e të drejtat e grave janë të drejta të njeriut, një herë e përgjithmonë,” u citua Hillary Clinton, ndërsa autori Hebibi falënderoi publikisht të gjitha gratë që me përkushtim dhe dashuri mbajnë gjallë ndjenjën kombëtare në mërgatë.
Të ardhurat nga shitja e librave do të dhurohen për një studente, bijë e një veterani të UÇK-së dhe UÇPMB-së – një gjest i ndjeshëm që lidhi letërsinë me humanizmin.
Në mesin e të ftuarve ishin personalitete të shumta nga fusha e diplomacisë, arsimit, artit dhe veprimtarisë kombëtare, ndër ta edhe ambasadorët e Maqedonisë së Veriut dhe Kosovës, përfaqësues të Ambasadës së Shqipërisë, si dhe përfaqësues të shoqatave dhe institucioneve të diasporës.
Mesazhi përshëndetës nga kryetarja e Komunës së Preshevës, znj. Ardita Sinani, theksoi se:
“Z. Hebibi nuk është vetëm autor i një vepre monumentale, por një zë i fuqishëm i kombit në diasporë – një studiues me vizion të qartë dhe një model për intelektualin që shndërron letrat në dritare të vetëdijes.”
Promovimi u mbyll me ndarje mirënjohjesh për kontribuues të ndryshëm dhe një koktej modest, përgatitur me përkushtim nga familja e autorit.
“Ky është vetëm fillimi. Do të ketë edhe pjesën e tretë dhe të katërt të këtij rrëfimi. Ka edhe shumë gra që meritojnë të jenë pjesë e këtij homazhi letrar,” u shpreh Dashnim Hebibi në fund të mbrëmjes.
Së shpejti: Reportazhi i zgjeruar me, foto dhe momente të veçanta nga kjo ngjarje e paharrueshme kulturore, në nderim të gruas shqiptare në diasporë. ( Foto nga Florim Useini)
SAM24.info