Drejtoresha artistike e Fest 64, Elhaida Dani, në një intervistë në emisionin “Çasti i duhur” në RTSH 1 HD foli për sfidat dhe përkushtimin që e kanë shoqëruar gjatë rrugëtimit të saj artistik.
Ajo tregoi se rruga e saj drejt suksesit shpesh ka qenë e vetmuar, por theksoi se pikërisht dashuria për muzikën e ka bërë ta përballojë çdo sfidë.
“Kam marrë shumë nga Italia dhe jo vetëm se pas Italisë kam lëvizur në Francë dhe kam bashkëpunuar me producentë të huaj dhe kam marrë anët më të mira prej tyre. Jam dedikuar 1.000%, sepse spektatorët të shohin një herë në skenë dhe atë kujtesë kanë gjithë jetën. Duke qenë se kam një natyrë të butë si persona, e kam kuptuar dhe e kam marrë e kam punuar shumë me veten. Nuk është asnjëherë diçka indiferente të jesh vetëm. Vetmia është diçka që nuk e kisha menduar para se të nisja këtë rrugë, por kam një pasion dhe dashuri shumë të madhe për muzikën dhe mendoj që ia vlen”, u shpreh Elhaida Dani.
Ajo tregoi se dëshira për të mësuar dhe për t’u përfshirë në një projekt të madh si Festivali i Këngës, e shtyu të ndërmerrte këtë hap, pavarësisht pasigurive fillestare.
Elhaida vlerësoi gjithashtu kontributin e figurave të njohura të muzikës shqiptare në formimin e saj profesional.
“Gjëja e bukur është se unë gjithmonë marrë sfida përsipër atëherë kur unë mendoj që nuk jam gati, sepse nëse do ti mendoja do të qëndroja e mbyllur në shtëpi pa bërë asgjë. Doja një sfidë sepse duke e njohur veten që jam një person shumë dedikuar dhe kam dëshirë të mësoj pafund dhe e dashuruar me këtë festival kaq të rëndësishëm mendova të tentoja. Por nëse pret që të jesh gati nuk do bësh kurrë hapa të mëdhenj në jetë. Kam mësuar gjëra pa fund nga ky institucion, nga emra si Shpëtim Saraçi, Alfred Kaçinari të cilët më kanë mësuar shumë”, tha ajo.
Sipas saj, Festivali i Këngës 64 do të vijë këtë vit me një identitet të ri artistik nën emrin “Neo Albanian Future”, një koncept që përfaqëson një Shqipëri moderne që nuk braktis rrënjët, por i ndërthur ato me frymën bashkëkohore.
“Vizioni im për këtë vit është që të mos humbasim autenticitetin, të rritemi, të mos kopjojmë vetën sepse një artist i mirë nuk kopjon asnjëherë. Rreth 118 këngën erdhën dhe aplikuan për festivalin dhe shumica e atyre këngëve janë moderne por edhe pak folk, këtë vit ka ndodhur që shumica e artistëve shqiptar që kanë sjellë këngët për festival janë frymëzuar nga fituesi i festivalit dhe kjo për mua është ti rikthesh vlerat atij. Ne po punojmë akoma në identitetin që dëshirojmë ti japim festivalit dhe do ta quajmë “Neo Albanian future” që do të thotë, një Shqipëri e cila punon fort me themelet e saj por duke parë botën e modernizuar”, theksoi Dani.
Ajo tha se është bërë një përzgjedhje shumë cilësore e këngëve, duke ndërtuar një mozaik muzikor të cilat do të përafrohen artistikisht me Orkestrën Simfonike live, një element kyç i Festivalit të Këngës.
“Këtë vit festivali do të vij me emrin “Neo Albanian future” që do të thotë shqiptarët që ja dalin në Shqipëri dhe s’kanë më nevojë të shkojnë nëpër botë por të qëndrojnë këtu. Mendoj që juria ka bërë një përzgjedhje shumë të mirë sepse ka bërë një miks shumë të mirë mes popit, folkut, rokut dhe do të përzihet shumë bukur me Orkestrën Simfonike live“, theksoi ajo, transmeton rtsh.