Kryetari i Parlamentit të Republikës së Turqisë, Prof. Dr. Numan Kurtulmuş i shoqëruar nga një grup deputetësh të Parlamentit dhe nga Ambasadori i Republikës së Turqisë në Republikën e Maqedonisë së Veriut z. Fatih Ulusoj e vizituan Universitetin e Tetovës.
Fillimisht delegacioni turk realizoi një takim miqësor me drejtuesit e Universitetit të Tetovës. Në këtë takim drejtuesit e UT-së i njoftuan mysafirët në pika të shkurtra mbi rrugëtimin gjatë këtyre 30 vjetëve të funksionimit. Po ashtu, diskutuan edhe mbi agjendën e aktiviteteve të realizuara dhe atyre që planifikon Universiteti ynë t’i realizojë në të ardhmen si në fushën arsimore, shkencore, infrastrukturore dhe teknologjike. Pas përfundimit të takimit, Kryetari i Parlamentit të Turqisë, Prof. Dr. Numan Kurtulmuş para studentëve dhe stafit akademik të universitetit tonë mbajti ligjëratë me temë: “Në kërkim të një sistemi të ri global”.
Fillimisht Rektori i UT-së Prof. Dr. Jusuf Zejneli në fjalën e tij mirëseardhëse në emër të gjithë bashkëpunëtorëve, studentëve dhe të punësuarve tjerë të Universitetit shprehu mirënjohjen dhe respektin për Kryetarin te Parlamentit të Republikës së Turqisë, Prof. Dr. Numan Kurtulmuş.
“Universiteti i Tetovës gjithmonë i ka kushtuar vëmendje të veçantë forcimit të marrëdhënieve ndërkombëtare dhe zhvillimit të mundësive për shkëmbimin e dijes, shkencës, kulturës dhe shkathtësive profesionale. Këto ura të ndërtuara miqësie ne i konsiderojmë të një rëndësie të jashtëzakonshme për të vazhduar forcimin e këtyre lidhjeve, në mënyrë që të mund të përfitojmë nga eksperienca dhe praktikat më të mira që ofrojnë universitetet e shteteve të zhvilluara, përfshirë edhe ato të Republikës së Turqisë. Ne jemi përkushtuar në shtrirjen ndërkombëtare të Universitetit me shumë institucione nga vendet e rajonit, Republika e Turqisë Evropa dhe Shtetet e Bashkuara të Amerikës. Ruajtja dhe kultivimi i bashkëpunimit me shumë universitete ndërkombëtare ka luajtur një rol të rëndësishëm në avancimin e programeve tona akademike dhe në krijimin e mundësive të reja për mobilitet të studentëve dhe stafit akademik si një instrument i fuqishëm për zhvillimin e Universitetit.” – theksoi ndër të tjera rektori i UT-së.
Ndërsa Kryetari i Parlamentit të Turqisë Prof. Dr. Numan Kurtulmuş në ligjëratën e tij drejtuar stafit, studentëve si dhe të pranishmëve të tjerë përmendi sfidat me të cilat po përballet bota, si ndryshimet klimatike, pabarazia midis kombeve dhe luftërat. Sipas tij: “Bota nuk mund të pësojë ndryshim drejt një sistemi më të drejtë dhe luftërat nuk mund të ndalen përderisa në rendin aktual botëror dominojnë një numër i vogël shtetesh, duke përmendur të drejtën e vetos të pesë vendeve anëtare të përhershme në Këshillin e Sigurimit të Kombeve të Bashkuara”. Kurtulmuş në ligjëratën e tij po ashtu tha se Turqia e sheh veten si pjesë të pandashme të rajonit të Ballkanit. “Të gjithë popujt këtu ne i shohim si anëtarë të familjes sonë. Duhet një përpjekje e rëndësishme që sistemi i ri të ndërtohet mbi katër parimet themelore si drejtësia, inkluzioni, pjesëmarrja dhe konsistenca. Ne do t’i vazhdojmë marrëdhëniet tona të ngushta me të gjithë popujt e rajonit të Ballkanit. Ne dëshirojmë që të gjithë popujt e Ballkanit të bëjnë përpjekje së bashku dhe në unitet drejt qëllimeve të përbashkëta.” – theksoi Kurtulmuş. Në fund të kësaj ligjërate në shenjë mirënjohjeje dhe respekti u ndanë dhurata për përfaqësuesit e institucioneve përkatëse./ UT
