Bülach, 17 qershor – Në kuadër të angazhimeve për forcimin e marrëdhënieve me institucionet lokale në Zvicër, Shefi i Misionit Konsullor të Republikës së Kosovës në Cyrih, z. Vigan Berisha, realizoi një takim të rëndësishëm me Kryetarin e qytetit të Bülach-ut, kanton i Cyrihut, z. Mark Eberli.
Gjatë këtij takimi u diskutua për mundësitë konkrete të bashkëpunimit në fusha me interes të përbashkët, me theks të veçantë në rolin e komunitetit shqiptar në Bülach dhe kontributin e tij të çmuar në jetën shoqërore dhe kulturore të qytetit. Të dy palët shprehën gatishmërinë për të thelluar më tej bashkëpunimin dhe për të mbështetur iniciativat që forcojnë integrimin dhe pjesëmarrjen aktive të mërgatës shqiptare.
Z. Berisha falënderoi Kryetarin Eberli për mikpritjen dhe mbështetjen e vazhdueshme që autoritetet lokale i japin mërgatës kosovare. Ai theksoi se ky takim është vazhdimësi e përpjekjeve për të ndërtuar ura mirëkuptimi dhe bashkëpunimi me komunitetin zviceran, përmes kontakteve të rregullta institucionale dhe miqësore.
Që nga marrja e detyrës, z. Berisha ka zhvilluar takime të shumta me përfaqësues të institucioneve dhe organizatave lokale në Zvicër, duke dëshmuar përkushtimin për avancimin e marrëdhënieve ndërmjet Kosovës dhe Zvicrës, si dhe ruajtjen e miqësisë së gjatë ndërmjet dy vendeve.
Për SAM24.info / D.H