Romë, 8 prill 2025 – Duke filluar nga 15 prilli 2025, në Itali hyn në fuqi një rregullore e re e qarkullimit rrugor, që ka të bëjë me ndërrimin e detyrueshëm të gomave dimërore në ato verore. Kjo masë ka për qëllim të rrisë sigurinë rrugore, por njëkohësisht sjell pasoja të ndjeshme për xhepin e drejtuesve të automjeteve – vendas dhe të huaj.
Sipas portalit altarimini.it, të gjithë drejtuesit e mjeteve që pas 15 prillit vazhdojnë të qarkullojnë me goma dimri, do të përballen me gjobë që varion nga 422 deri në 1682 euro. Në rastet më të rënda, autoritetet italiane mund të shkojnë deri në revokimin e regjistrimit të automjetit.
Ka një periudhë kalimtare deri më 15 maj 2025, gjatë së cilës shkelësit do të paralajmërohen, por pas kësaj date nuk do të ketë më tolerime.
Ndërkohë, edhe përdorimi i gomave të konsumuara ose jashtë standardeve do të dënohet me gjoba shtesë, që variojnë nga 87 deri në 344 euro. Në rast aksidenti, nëse vërtetohet se gomat nuk kanë qenë të përshtatshme, kompanitë e sigurimeve mund të refuzojnë mbulimin e dëmit.
Ky ndryshim prek në mënyrë të drejtpërdrejtë shumë bashkatdhetarë shqiptarë që udhëtojnë me makinë drejt Shqipërisë, Kosovës, Maqedonisë, Malit të Zi apo Luginës së Preshevës për pushime apo vizita familjare, duke kaluar nëpërmjet Italisë. Shpenzimet për ndërrimin e gomave, përfshirë çeqet e konsumimit dhe punën teknike, mund të arrijnë deri në 1000 euro, duke përbërë një barrë shtesë për shumë familje.
Autoritetet sugjerojnë që të gjithë ata që planifikojnë të udhëtojnë me automjet nëpër territorin italian pas datës 15 prill, të kontrollojnë dhe të pajisen me goma verore, në mënyrë që të shmangin gjobat dhe ndërlikimet me sigurimin në rast incidenti, njofton SAM24.info.
SAM24.info
