Hapja e grup- kapitullit të 6-të të negociatave për anëtarësimin e Shqipërisë në BE, është vlerësuar edhe nga Presidenti i Shqipërisë, Bajram Begaj.
Nëpërmjet një postimi në rrjetet sociale, kreu i shtetit, përshëndeti hapjen e grup-kapitullit të gjashtë të negociatave për anëtarësimin e Shqipërisë në Bashkimin Evropian, vendim i marrë të martën në Konferencën e Tretë Ndërqeveritare Shqipëri-BE, të mbajtur në Bruksel.
Sipas tij, ky vendim afron hyrjen e Shqipërisë në Bashkimin Evropian.
“Përshëndesim hapjen e negociatave për grup-kapitullin e gjashtë. Vendimi i sotëm dëshmon për ecurinë e sigurt të Shqipërisë drejt anëtarësimit në një të ardhme të afërt në BE”, shkruan Presidenti Begaj në rrjetet sociale.
Miratimi i konkluzioneve
Këshilli Evropian miratoi konkluzionet e zgjerimit për 6 vendet e Ballkanit Perëndimor, Turqinë, Ukrainën, Republikën e Moldavisë dhe Gjeorgjinë. Në konkluzionet për Shqipërinë, thuhet se vlerësohet puna e bërë deri tani, por kërkohet dialog politik me qëllim përparimin e reformave.
Në dokument thuhet se Këshilli mirëpret hapjen e grup-kapitujve “Themeloret” në konferencën e dytë ndërqeveritare që u mbajt më 15 tetor 2024 dhe hapjen e grup-kapitujve “Marrëdhëniet e Jashtme”. Gjithashtu vlerësohet objektivi i qeverisë për të vazhduar progresin e Shqipërisë në rrugën e saj drejt BE-së, teksa nxiten të gjitha forcat politike të ndjekin planin për mbylljen e negociatave të anëtarësimit.
“Duke vënë në dukje se polarizimi politik vazhdon të ndikojë në aktivitetet e parlamentit, Këshilli Evropian rikujton se dialogu politik gjithëpërfshirës dhe konstruktiv në vend mbetet vendimtar për progresin në reformat që kanë të bëjnë me BE-në. Këshilli mirëpret progresin e bërë në reforma, veçanërisht në fushat e Themeloreve dhe ligjit të së drejtës. Këshilli vëren pozitivisht zbatimin e vazhdueshëm të reformës në drejtësi nga Shqipëria, e cila duhet të konsolidohet, duke sjellë përmirësime të mëtejshme në paanshmërinë, pavarësinë dhe profesionalizmin e sistemit gjyqësor”, thuhet në raport.
Këshilli mirëpret gjithashtu avancimin e procesit të vetingut dhe në veçanti përfundimin e përpunimit të çështjeve në shkallë të parë dhe nxit Shqipërinë të përfundojë të gjithë procesin në kohën e duhur. Këshilli rithekson se vendimet detyruese të Gjykatës Kushtetuese duhet të respektohen dhe zbatohen plotësisht.
Po ashtu vlerësohen pozitivisht rezultatet e arritura nga Struktura e Posaçme Kundër Korrupsionit dhe Krimit të Organizuar (SPAK) dhe gjykatat e saj, përfshirë rastet e korrupsionit të nivelit të lartë, si dhe bashkëpunimin e mirë me agjencitë ligjzbatuese të BE-së dhe vendeve anëtare.
“Kjo duhet të vazhdojë, duke përfshirë bashkëpunimin për hetimet financiare. Nevojiten gjithashtu kontrolle të forta dhe kapacitete të konsoliduara për të mbrojtur interesat financiare të BE-së“, thotë KiE.
Lufta kundër krimit
Këshilli rikujton rëndësinë e vazhdimit të përpjekjeve për të krijuar një histori solide në luftën kundër krimit të organizuar dhe korrupsionit, përfshirë në nivel të lartë.
Këshilli mirëpret progresin e bërë në fushën e reformës së administratës publike dhe nxit Shqipërinë të vazhdojë me zbatimin e saj, teksa bën thirrje që të forcohet mbrojtja e të drejtave themelore, duke përfshirë mbrojtjen e të drejtave të personave që u përkasin pakicave. Raporti shpreh shqetësimin se nuk është bërë asnjë progres në lirinë e medias dhe lirinë e shprehjes dhe të drejtat e personave që u përkasin pakicave.
Shqipëria duhet të rrisë përpjekjet e saj për të forcuar pavarësinë dhe pluralizmin e medias – duke rritur transparencën e pronësisë së medias dhe duke siguruar një mjedis të sigurt për gazetarët.
“Duke kujtuar qëndrimin e përbashkët të BE-së për grup-kapitujt e parë, Këshilli mirëpret miratimin e legjislacionit dytësor për pakicat dhe merr parasysh angazhimet e ndërmarra nga Shqipëria për të miratuar me shpejtësi deri në fund të vitit dhe për të zbatuar aktet e mbetura nënligjore – në lidhje me ligjin kuadër të vitit 2017 për mbrojtjen e personave që u përkasin pakicave kombëtare në përputhje me standardet evropiane dhe me përfshirjen e të gjithë aktorëve përkatës. Në të njëjtën mënyrë, Këshilli nxit zbatimin e një reforme gjithëpërfshirëse të sektorit të pronësisë dhe konsolidimin e të drejtave pronësore në një mënyrë transparente. Roli i shoqërisë civile duhet të forcohet më tej dhe të përforcohen konsultimet kuptimplota“, shkruhet në raport.
Reforma Zgjedhore
Për reformat zgjedhore, Këshilli nënvizon nevojën për të adresuar rekomandimet e pazgjidhura nga OSBE/ODIHR dhe Komisioni i Venecias në mënyrë gjithëpërfshirëse dhe në kohë.
Këshilli njeh progresin e bërë në menaxhimin e migracionit dhe kufirit, ndërsa thekson nevojën për përparim të mëtejshëm në procedurat e azilit dhe përafrim të plotë me politikën e vizave të BE-së.
Për kriteret ekonomike, Këshilli “mirëpret nivelin e mirë” të përgatitjes së Shqipërisë në zhvillimin e një ekonomie tregu funksionale dhe nxit Shqipërinë të vazhdojë përpjekjet për të avancuar në kapacitetin e saj për të përballuar presionin konkurrues dhe forcat e tregut brenda Bashkimit Evropian dhe për të zbatuar reformat e nevojshme strukturore.
Këshilli mirëpret angazhimin e vazhdueshëm konstruktiv të Shqipërisë në bashkëpunimin rajonal, teksa vëren se marrëdhëniet e fqinjësisë së mirë dhe bashkëpunimi rajonal mbeten elemente thelbësore të procesit të zgjerimit, si dhe të Procesit të Stabilizim-Asociimit.
“Këshilli vlerëson fuqishëm Shqipërinë për bashkëpunimin e saj të qëndrueshëm në çështjet e politikës së jashtme dhe në veçanti përafrimin e saj të plotë dhe afatgjatë me CFSP-në e BE-së – përfshirë masat kufizuese të BE-së – një sinjal i fortë i angazhimit strategjik të Shqipërisë në rrugën e saj drejt BE-së. Këshilli gjithashtu mirëpret pjesëmarrjen e vazhdueshme aktive të Shqipërisë në misionet dhe operacionet e BE-së në kuadër të CSDP-së dhe Sigurisë së re – Partneritetin e ri të Sigurisë dhe Mbrojtjes ndërmjet BE-së dhe Shqipërisë, i cili hap rrugën për rritjen e bashkëpunimit në fusha kyçe“, thuhet në raport. /rtsh.al/