Më shumë se 500 veteranë të Ushtrisë Çlirimtare të Kosovës dhe qytetarë nga Kosova u nisën të premten me autobus për të udhëtuar drejt Holandës, ku së bashku me qytetarë edhe nga Shqipëria, si dhe vende të ndryshme të botës, do të mbajnë një protestë masive pranë ndërtesës së Gjykatës Speciale, siç njihen Dhomat e Specializuara të Kosovës me seli në Hagë, ku po gjykohen ish-krerët e UÇK-së: Hashim Thaçi, Kadri Veseli, Rexhep Selimi dhe Jakup Krasniqi.
“Telefonat tanë në grupet e Këshillit Organizativ nuk pushojnë për asnjë çast. Nuk mund të jap shifra, por interesimi është shumë i madh dhe besoj që do të jetë një protestë madhështore. I kemi bërë thirrje gjithë popullit shqiptar, të gjitha institucioneve të Republikës së Kosovës, të gjitha partive politike, pa ngjyrime, sepse kjo është një protestë gjithëpopullore në mbrojtje të shtetësisë së Kosovës, të luftës sonë të drejtë dhe të krerëve të UÇK-së që ndodhen në Hagë,” deklaroi për “KosovaPress”, Fatmir Koçi, kryetari i Shoqatës së Veteranëve në Evropë.
Ish-presidenti Thaçi, ish-kryetarët e Kuvendit, Kadri Veseli dhe Jakup Krasniqi, si dhe ish-deputeti Rexhep Selimi akuzohen për krime lufte dhe krime kundër njerëzimit gjatë luftës së fundit në Kosovë, akuza që të katër ish-krerët e UÇK-së i kanë hedhur poshtë.
Gjykimi ndaj tyre nisi në prill të vitit 2023, ndërkohë që ndodhen në paraburgim që nga nëntori i vitit 2020. Më 15 shtator, avokatët e tyre pritet të nisin paraqitjen e provave dhe dëshmitarëve. /Elda Pepa, transmeton rtsh.