Kjo vizitë simbolizoi bashkimin e artit me diplomacinë dhe arsimin shqiptar në diasporë, duke forcuar lidhjet mes institucioneve që punojnë çdo ditë për ruajtjen dhe promovimin e identitetit, gjuhës dhe kulturës kombëtare ndër brezat e rinj në mërgatë.Në sallat ku çdo javë ushtrojnë anëtarët e Ansamblit “TROJET”, patëm kënaqësinë të mirëpresim Konsullin e Republikës së Kosovës në Cyrih, z. Vigan Berisha, si dhe Kryetarin e LAPSH-it në Zvicër, z. Naser Ulaj, i cili është gjithashtu mësues në mësimin plotësues në gjuhën shqipe në Cyrih dhe një mbështetës i përhershëm i arsimit dhe kulturës shqiptare në mërgatë.
Vizita e tyre ishte një moment i veçantë për familjen e madhe “TROJET”. Në këtë mjedis ku gjatë ditës zhvillohet mësimi dhe përhapet dija, ndërsa në mbrëmje frymon shqip, u ndanë emocione, këngë, valle dhe dashuri për kulturën kombëtare.
Në shenjë falënderimi për mbështetjen e vazhdueshme dhe bashkëpunimin në promovimin e vlerave tona kombëtare në diasporë, Ansambli “TROJET” ndau mirënjohje për:
• Z. Vigan Berisha, Shef i Misionit në Konsullatën e Republikës së Kosovës në Cyrih
• Z. Naser Ulaj, Kryetar i LAPSH-it në Cyrih
Në fjalën e tij, Konsulli Vigan Berisha përgëzoi punën e Ansamblit “TROJET” dhe falënderoi udhëheqësit dhe prindërit për përkushtimin e tyre të palodhshëm në ruajtjen e gjuhës dhe trashëgimisë sonë. Ai nënvizoi rëndësinë e ruajtjes së identitetit kulturor dhe artistik në diasporë, duke theksuar se ky angazhim është shembull i gjallë i dashurisë për atdheun që shprehet përmes artit, bashkimit dhe përkushtimit të brezave të rinj.
Ndërsa Kryetari i LAPSH-it, z. Naser Ulaj, vlerësoi lart bashkëpunimin kulturor mes LAPSH-it dhe Ansamblit “TROJET”. Ai falënderoi udhëheqësit për punën e tyre të palodhshme në ruajtjen e gjuhës dhe trashëgimisë sonë kombëtare, duke u bërë thirrje fëmijëve dhe të rinjve që të vijojnë mësimin plotësues në gjuhën shqipe – si themel i identitetit kombëtar në mërgatë.
Në emër të kryesisë, znj. Albulena Gjota mbajti një fjalë rasti përshëndetëse, duke vlerësuar grupin e të rinjve të ansamblit si ambasadorë të kulturës dhe kombit shqiptar. Ajo theksoi se edhe pse janë rritur në mërgim, të rinjtë e “TROJEVE” po dëshmojnë çdo ditë se nuk e kanë harruar gjuhën, historinë dhe traditat shqiptare, duke i bashkuar vlerat e vendlindjes me virtytet e Zvicrës si përpikmëria, disiplina dhe respekti.
Në fjalën përshëndetëse, Kryetari i Ansamblit “TROJET” theksoi se patriotizmi fillon në familje – me ruajtjen e gjuhës, historisë, kulturës dhe traditës sonë. Ai shtoi se ky përkushtim vazhdon me punë të ndershme, respekt për njëri-tjetrin dhe dashuri për atdheun, që përcillet brez pas brezi.
“TROJET” mbetet një vatër e gjallë kulture, ku çdo javë të rinj e fëmijë mblidhen për të ushtruar artin dhe shpirtin shqiptar, me përkushtimin e udhëheqësve artistikë DonJeta, Ensar dhe Leotrim, të cilët me dashuri e pasion e mbajnë gjallë misionin tonë kulturor.
Kjo vizitë vulosi edhe njëherë bashkëpunimin e ngushtë mes institucioneve tona arsimore, kulturore dhe diplomatike në Zvicër – për të ruajtur, forcuar dhe trashëguar vlerat kombëtare shqiptare në mërgatë.
Ansambli “TROJET” / SAM24.info