I nderuar Imzot Vincenzo Paglia,
Të nderuar të pranishëm, kolegë, miq e studentë,
Sot, në qytetin tonë të dashur, në Pejën që rrezaton histori, kulturë dhe mikpritje, të emocionuar dhe të përulur, jemi dëshmitarë të një akti që tejkalon çdo protokoll formal: Universiteti “Haxhi Zeka” i jep titullin më të lartë nderurës, Doctor Honoris Causa, një njeriu që mishëron vlerat më të larta të humanizmit, guximit moral dhe përkushtimit ndaj njeriut.
Duke u nderuar sot Juve, Imzot Vincenzo Paglia, ne nuk po vlerësojmë vetëm një figurë të shquar të botës fetare. Ne po përkulemi me respekt para një zëri që ka folur kur të tjerët heshtën, një zemre që ka rrahur për drejtësinë kur bota kthente shpinën, dhe një mendjeje që e kupton thellësisht kuptimin e jetës si dhuratë e shenjtë dhe të përbashkët.
Në kohët më të vështira të Kosovës, kur dhuna, pasiguria dhe izolimi rëndonin mbi këtë popull, ju nuk qëndruat larg. Zëri juaj nuk u dridh, as nuk u fsheh. Ju zgjodhët të ndërmjetësoni, të dëgjoni, të flisni, të afroni, atje ku rrugët ishin të mbyllura dhe shpresat të rralluara. Në një realitet të ngulfatur nga frika dhe padrejtësia, Ju thatë fjalë që hapnin dritare.
Kur fëmijët e studentët shqiptarë u ndaluan të shkonin në shkolla e universitete, ju ishit një ndër ata që ndihmuan që ata të ktheheshin në bankat shkollore – jo vetëm si një e drejtë, por si një nevojë jetike për të ardhmen. Ishit Ju që u bëtë ura që lidhte shpresën me realitetin. Ju që nuk lejuat që dijenia të shuhej, as që dinjiteti njerëzor të nëpërkëmbet.
Veprimet tuaja nuk ishin as pragmatike e as të kalkuluara. Ishin të guximshme dhe të pastra – një shprehje e bindjes se paqja nuk ndërtohet mbi heshtje, por mbi të vërteta të thëna me kurajo. Ju e keni ditur gjithmonë: njerëzimi nuk fillon te doktrina, por te njeriu.
Edhe sot, në një botë që përballet me sfida të mëdha – nga krizat etike e të tjera deri të pyetjet e sfidat që na shtrojnë teknologjia dhe ndryshimet sociale – ju vazhdoni të qëndroni si një udhërrëfyes. Në rolin tuaj si President i Akademisë Papnore për Jetën dhe si frymë shpirtërore e Komunitetit të Shën Egjidios, juve flisni për jetën me një ton që bashkon shkencën me dhembshurinë, fenë me përgjegjësinë, arsyen me zemrën.
Sot, ky universitet ju nderon jo vetëm për atë çfarë keni bërë, por edhe për atë që përfaqësoni. Ju nderojmë sepse më arsye shpresojnë se dritën që ju mbani, do të vazhdojë të ndriçojë mendjet dhe zemrat e studentëve tanë.
Sepse shpresojmë që edhe ne – si pedagogë, si qytetarë, si njerëz – të marrim nga ju guximin për të vepruar kur heshtja bëhet e rrezikshme.
I dashur Imzot Paglia,
Titulli “Doctor Honoris Causa” që sot ju dorëzojmë është më shumë se një vlerësim. Është një përqafim nga një popull që nuk harron. Është një shenjë mirënjohjeje për një mik që nuk e braktisi kurrë, për një burrë që besoi në paqe edhe kur ajo duket larg, për një njeri që gjithmonë mbrojti jetën dhe dinjitetin – pa kushte.
Në emër të Universitetit “Haxhi Zeka”, në emër të qytetit të Pejës dhe të gjithë atyre që besojnë në fjalën “njeri”, Ju shprehim mirënjohjen tonë më të thellë dhe më të sinqertë.
Titulli që sot merrni është një dëshmi që e vërteta, drejtësia dhe shpresa kanë vend në këtë botë – për aq kohë sa ka njerëz që, si Ju, ecin përkrah tyre.
Faleminderit për gjithçka.
Mirë se vini përgjithmonë në zemrën e Universitetit tonë
#UniversitetiHaxhiZeka #uhz #Paqe #DoctorHonorisCausa #Rector