Një nga sfidat aktuale të universitetit “Eqrem Cabej” është ndërkombëtarizimi. Në këtë kuadër ky institucion akademik është në prag të konkretizmit të një programi të dyfishtë në infermieri me universitetin e Piemontes në Itali.
Ky bashkëpunim mes dy institucioneve akademike ka ardhur nisur nga nevojat që ka tregu europian për profesionistë në këtë fushë.
“Jemi në prag të konkretizimit të një programi të dyfishtë me infermierinë me universitetin e Piemontes në Itali. Kjo është një risi shumë e rëndësishme duke pasur parasysh që kërkesat e tregut europian në fushën e infermierisë janë të jashtëzakonshme. Në bashkëpunim me këtë universitet, kemi dërguar sylabuset e programeve tona dhe ata të tyren. Është një diplomë që njihet në të gjithë hapësirën e tregut të përbashkët europian”, tha Jaho Cana, rektor i Universitetit “Eqrem Çabej”, Gjirokastër.
Automatikisht kjo do të thotë një diplomë bachelor e njohur në gjithë hapësirën e tregut europian, ndërsa për ecurinë e mëtejshme të universitetin “Eqrem Cabej” shihet si një perspektive e madhe.
“Studentët tanë kanë mundësi që aftësitë e tyre teorike, ti konkretizojnë në praktikë, pranë universiteteve partnerë të Spanjës, Greqisë, Polonisë dhe SHBA. Është një përvojë shumë e madhe që vlen në pikëzimin e tyre në marrjen e diplomës përfundimtare nga universiteti jonë.”, tha rektori Cana.
Dy vjet më parë në universitetin e Gjirokastrës u çelën dy programe bachelor në bashkëpunim me universitete italiane Menaxhim Digjital dhe Menaxhim i turizmit të qëndrueshëm nga Y.Ponde, transmeton rtsh.