Nga Dashnim Hebibi
Që nga mosha gjashtëvjeçare, Eliza ka nisur rrugëtimin e saj artistik në Ansamblin “TROJET”, duke sjellë mbi skenë energji, dritë dhe dashuri për vallen shqiptare. Sot, ajo jo vetëm që vazhdon të kultivojë pasionin për vallet tradicionale, por ka zgjeruar talentin e saj edhe në fushën e këngës.
Eliza përfaqëson një model të përkushtimit dhe të forcës së ëndrrave, duke dëshmuar se arti shqiptar mund të lulëzojë edhe larg atdheut. Çdo hap i saj në valle dhe çdo tingull i zërit të saj kthehen në emocion për publikun shqiptar në diasporë.
Nëna e saj, veprimtarja e njohur dhe aktivistja kulturore, znj. Sherife Ejupi Zeqiri, shprehet për sam24.info se ndihet thellësisht krenare për bijën e saj:
“Jam e lumtur që shoh tek Eliza shpirtin e lirë dhe të guximshëm, i cili rrezaton dritë kudo që ngjitet në skenë. Vallëzon me shpirt dhe këndon me zemër. Kur prindërit i udhëzojnë fëmijët në rrugën e traditës, arti fiton jetë të re.”
Znj. Zeqiri, e cila për vite me radhë ka dhënë kontribut të çmuar në ruajtjen dhe promovimin e kulturës shqiptare në Zvicër, apelon tek prindërit shqiptarë në diasporë që të mos e lënë të shuhet lidhja e fëmijëve me traditën dhe kulturën kombëtare:
“Respektoni dhe drejtoni fëmijët që të mos e harrojnë trashëgiminë tonë. Vetëm atëherë prindi ndihet vërtet i lumtur në mërgatë.”
Eliza, edhe pse po rritet larg vendlindjes së të parëve, është dëshmi se arti dhe tradita shqiptare jo vetëm që mund të ruhen, por edhe të zhvillohen, duke forcuar njëkohësisht lidhjet kulturore e miqësore me Zvicrën mike.