Në sheshin para Bashkisë Shkodër u organizua Marshimi Sensibilizues “Ecim për Autizmin”, një nismë e fuqishme që synon të rrisë ndërgjegjësimin dhe të mbështesë personat me autizëm dhe familjet e tyre.
Ky marshim, i cili simbolizon solidaritetin dhe mbështetjen, u organizua në kuadër të Ditës Ndërkombëtare të Ndërgjegjësimit për Autizmin, duke sjellë një mesazh të fuqishëm për një shoqëri më të hapur dhe të përfshirëse.
Marshimi u organizua në bashkëpunim me aktorë që janë pjesë e këj kauze, Bashkinë Shkodër, si dhe Universitetin e Shkodrës “Luigj Gurakuqi” (UNISHK). Studentët e Pedagogjisë Speciale të vitit të parë, nga FSHE, morën pjesë aktivisht dhe shprehën solidaritetin e tyre përmes një eksperience unike dhe emocionale të quajtur “Stacionet shqisore”.
Kjo iniciativë synonte të rriste ndërgjegjësimin mbi autizmin dhe të forconte empatinë ndaj mendjeve ndryshe përmes eksperiencave shqisore të simuluara. Studentët dhe pedagogët u vendosën për pak momente në “botën” e personave me autizëm, duke provuar ndjesitë e tyre dhe sfidat me të cilat ata përballen çdo ditë.
Mesazhi i marshimit
“Secila mendje është një univers i veçantë dhe çdo individ ka mënyrën e tij unike për të përjetuar botën. Le të respektojmë dhe festojmë çdo mënyrë të të menduarit, pa tentuar të vendosim standarde se ‘të gjithë duhet të mendojnë njëlloj’ për të qenë të vlefshëm në shoqëri!”
Në marshim ishte i pranishëm edhe rektori i Universitetit të Shkodrës, Prof. Dr. Tonin Gjuraj, i cili përshëndeti nismën dhe përgëzoi studentët dhe pedagogët për angazhimin e tyre të vyer në mbështetje të kauzës së autizmit.
Le të ecim së bashku për një shoqëri më të ndërgjegjshme, më të hapur dhe më përfshirëse!
