Me rastin e 12-vjetorit të shërbimit si imam dhe 8 vite si kryetar i Qendrës Shqiptare për Integrim, Kulturë dhe Religjion në Lozanë
Të nderuar vëllezër dhe motra,
Sot, me zemër plot mirënjohje dhe përulësi para Zotit , dua të ndaj disa mendime me rastin e 12-vjetorit të shërbimit tim si imam i Qendrës sonë dhe përfundimit të dy mandateve si kryetar i saj – gjithsej 8 vite në krye të një institucioni që tashmë është shndërruar në një pikë referimi të rëndësishme për shqiptarët në Kantonin Vaud dhe më gjerë.
Kur kujtoj ditën e parë që kam ardhur në Qendër, më kujtohet shumë qartë: atëherë numri i anëtarëve ishte rreth 75. Ishte një komunitet i vogël, por me zemër të madhe, me shumë shpresë dhe gatishmëri për të punuar dhe për t’u rritur. Sot, pas dymbëdhjetë vitesh angazhim të përbashkët, Qendra jonë numëron afro 600 anëtarë aktivë – një dëshmi e përkushtimit, bashkëpunimit dhe dashurisë për fenë, kulturën dhe rrënjët tona kombëtare.
Qendra Shqiptare për Integrim, Kulturë dhe Religjion në Lozanë nuk është më thjesht një vend ku kryhen ritualet fetare. Ajo është shndërruar në qendrën më të madhe të kantonit Vaud dhe një nga vendet me aktivitetet më të shumta e të dalluara në nivel të Zvicrës. Nga organizimi i ligjëratave e mësimeve për fëmijët dhe të rinjtë, te aktivitetet kulturore e sociale, nga programet për integrim të suksesshëm deri te promovimi i vlerave familjare dhe mbështetja për gjininë femërore – çdo hap është bërë me qëllimin e ndërtimit të një komuniteti të fortë dhe të bashkuar.
Për këtë sukses, nuk mund të mos shpreh falënderime të thella për të gjithë ata që kanë qenë dhe janë pjesë e kësaj rruge. Një falënderim i veçantë shkon për kryesinë e xhamisë së vitit 2013, me në krye z. Ismet Murtezi, si dhe për të gjithë anëtarët e asaj kohe që patën besim dhe më zgjodhën mua si imam – prijës i tyre shpirtëror. Ky besim ka qenë për mua një përgjegjësi e madhe, por edhe një motiv për të punuar çdo ditë me sinqeritet dhe përkushtim.
Po ashtu, falënderim të veçantë për çdo anëtar të kryesisë ndër vite, për secilin vullnetar, aktivist, donator dhe dashamir të Qendrës sonë – kontributi juaj është shtylla mbi të cilën është ndërtuar çdo arritje.
Nuk mund të mos e përmend me dashuri dhe respekt të veçantë bashkëshorten time, prof. Enisa P. Abazi, e cila me përkushtimin dhe përkrahjen e saj të palodhshme ka qenë gjithmonë krah meje në këtë rrugëtim. Ajo ka luajtur një rol të jashtëzakonshëm në fuqizimin e gjinisë femërore brenda komunitetit tonë, përmes edukimit, këshillimit dhe aktiviteteve të shumta me gratë dhe nënat tona.
Tani që kemi arritur këtu ku jemi, misioni ynë nuk përfundon.
Përkundrazi, tani nis një kapitull i ri me synime të qarta: të forcojmë edhe më shumë punën me rininë dhe gjeneratat e reja, të rrisim numrin e anëtarëve aktivë dhe të ruajmë unitetin e komunitetit tonë në përballje me sfidat e kohës.
Lus Zotin të na udhëzojë drejt së mirës, të na japë shëndet e qëndrueshmëri, dhe të na mbajë gjithmonë të bashkuar për hir të fesë, kulturës dhe identitetit tonë.
Me respekt të thellë dhe mirënjohje të pafund,
Fehim Abazi
Imam dhe ish-Kryetar i Qendrës Shqiptare për Integrim, Kulturë dhe Religjion në Lozanë
