Nga Dahest LUMA, Tetovë
Tetovë, 25 tetor 2025 – Nën organizimin e Shoqatës Akademike të Shqiptarëve për Shkencë dhe Art – Akademia, me seli në Tetovë dhe nën drejtimin e Prof. Dr. Hasan Jasharit, u mbajt me sukses Konferenca e VII Shkencore “Shqiptarët në Maqedoni – Jeta Urbane dhe Rurale”, një forum prestigjioz i cili mblodhi mbi 30 studiues, profesorë universitarë dhe figura të njohura të botës akademike shqiptare nga vendi, trojet tjera etnike shqiptare dhe diaspora.
Në këtë aktivitet shkencor me peshë, mori pjesë edhe PhD Dashnim Hebibi, President i Institutit Helvetik për Studime të Evropës Juglindore (HSS) me seli në Zvicër dhe kryeredaktor i Qendrës Mediale Shqiptare sam24.info, i cili kontribuoi me një kumtesë të mirëpritur nga të pranishmit dhe që u dorëzua zyrtarisht te Prof. Dr. Hasan Jashari, president i Akademisë.
Fjalimi i PhD Dashnim Hebibit: Diaspora si pasuri intelektuale dhe kulturore e kombit shqiptar
Në fjalën e tij përshëndetëse, PhD Dashnim Hebibi shprehu nderimin dhe kënaqësinë për mundësinë e pjesëmarrjes në këtë forum shkencor të rëndësishëm, duke theksuar vlerën e bashkëpunimit akademik ndërmjet institucioneve shqiptare dhe diasporës shkencore.
“Ndjehem shumë i nderuar që më është dhënë mundësia të jem i pranishëm si mysafir i ftuar në këtë konferencë, që në cilësinë e udhëheqësit të Institutit Helvetik të Studimeve për Evropën Juglindore me seli në Zvicër, të përshëndes të pranishmit dhe të ndjek punimet e kësaj konference me përmbajtje dhe përbërje madhështore pjesëmarrësish”, u shpreh ai.
Duke u ndalur në temën e konferencës, Hebibi theksoi rëndësinë e lidhjes midis jetës urbane e rurale të shqiptarëve autoktonë në Maqedoninë e Veriut dhe rolit të diasporës si pjesë e pandarë e identitetit kombëtar.
“Nuk do të ishte e tepërt të përmendet me krenari edhe nukleusi kombëtar me origjinë nga Maqedonia e Veriut e sotme, i shpërndarë nëpër botë, e veçanërisht në shtetet e Evropës Qendrore. Kjo diasporë ka dëshmuar se i përket një qytetërimi të trashëguar gjenetikisht nga rrënjët e hershme të historisë së Gadishullit Ilirik”, shtoi Hebibi.
Ai vlerësoi se gjenerata e re e shqiptarëve të mërguar sot përfaqëson një potencial të jashtëzakonshëm në fushën e arsimit, teknologjisë, biznesit dhe kulturës, duke u bërë ambasadorë të denjë të kombit në arenën ndërkombëtare.
“Është pikërisht një forum si ky që duhet të gjenerojë projekte strategjike për t’i dhënë arsye komunitetit shqiptar të shpërndarë nëpër botë që ta shohë atdheun si hapësirë të përshtatshme për të ofruar kontributin e tij në shkencë, administratë, ekonomi e në çdo fushë tjetër të jetës publike”, theksoi ai.
Në përfundim të fjalës së tij, PhD Hebibi shprehu mirënjohje dhe respekt për organizatorët e konferencës, duke uruar që rezultatet e punimeve shkencore të shërbejnë si bazë për avancimin shumëdimensional të pozitës së shqiptarëve në Maqedoninë e Veriut dhe më gjerë.
Mirënjohje për kontributin e dhënë në fushën akademike dhe mediatike
Në fund të aktivitetit, PhD Dashnim Hebibi u nderua me një mirënjohje të veçantë nga organizatorët për kontributin e tij të çmuar në fushën shkencore dhe në promovimin e vlerave shqiptare përmes platformave mediatike:
- sam24.info, si zë i rëndësishëm informativ i mërgatës shqiptare, dhe
- helveticalforum.ch, një hapësirë analitike dhe akademike ku trajtohen çështje të rëndësishme të diasporës shqiptare në Evropë.
- Një takim me vlerë akademike dhe shpirt bashkëpunimi
Gjatë konferencës, PhD Hebibi pati rastin të takohej dhe të bashkëbisedojë me shumë personalitete të botës akademike, ndër ta Prof. Dr. Ali Pajaziti, Prof. Dr. Abdulla Azizi, si dhe figura të tjera të njohura të arsimit e shkencës shqiptare.
Në fund, ai theksoi se pjesëmarrja në këtë forum përfaqëson një privilegj, përgjegjësi dhe frymë të re bashkëpunimi shkencor midis institucioneve shqiptare dhe atyre ndërkombëtare, në funksion të zhvillimit të studimeve shqiptare në nivel global. /SAM24.info
