Nga: Dashnim HEBIBI, Cyrih
Cyrih, 14 Korrik 2025 –Java ka nisur me fluks udhëtarësh në aeroportin e Cyrihut, shumica prej tyre bashkatdhetarë që po nisen drejt Kosovës, Maqedonisë së Veriut dhe Luginës së Preshevës. Sezoni i pushimeve verore ka rritur ndjeshëm numrin e fluturimeve dhe për këtë kemi pasur disa shkrime para ca ditëve, por bashkë me to edhe çmimet e biletave – aq sa për shumë familje me 5 apo më shumë anëtarë, kthimi në atdhe po bëhet luks i papërballueshëm.
Sot në mëngjes, aeroplani i parë u nis për në Prishtinë në orën 05:45, e më pas një tjetër në 06:45. Gjatë ditës, priten edhe disa fluturime të tjera për Prishtinë dhe Shkup. Por ajo që ra në sy për ne nga sam24.info ishte një fluturim për në Nish, ku pamë edhe udhëtarë shqiptarë që po udhëtonin drejt Kosovës dhe viseve shqiptare përmes këtij destinacioni më pak të zakonshëm.
Nga bisedat me disa prej tyre, të cilët i kontaktuam me kujdes, mësojmë se vendimi për të udhëtuar përmes Nishit kishte të bënte me çmimet – të cilat ishin pothuajse gjysma e atyre për në Prishtinë apo Shkup.
“Jemi familje e madhe dhe nuk ia dalim dot me këto çmime të sezonit. Bileta për në Nish na kushtoi shumë më lirë. Normalisht do të shkonim përmes Prishtinës, por kur nuk të mban xhepi, kërkon rrugë të tjera. Askush nuk ma jap ma lirë biletën, se edhe ne jo me dëshirë po shkojmë andej,” – tha një familjar, i njohur për redaksinë tonë.
Disa kishin marrë parasysh edhe opsionin përmes Tiranës, por çmimet edhe atje ishin jashtë mundësive të tyre.
“Jashtë sezonit kemi udhëtuar për Prishtinë me 50 franga. E kuptojmë që edhe kompanitë duhet të mbijetojnë, por edhe ne si familje duhet të llogarisim çdo cent,” shtoi ai.
Ndërkohë, burime të sam24.info konfirmojnë se disa bashkatdhetarë po përdorin rrugë edhe më të ndërlikuara – si p.sh. Cyrih–Zagreb, e më pas nga Zagrebi për në Shkup. Ka edhe nga ata që udhëtojnë nga Gjermania drejt aeroporteve më të vegjël afër kufirit me Zvicrën, gjithçka për të kursyer disa qindra euro.
Pavarësisht këtyre përpjekjeve, nuk mungojnë edhe reagimet emocionale. Në aeroportin e Cyrihut, në orët e hershme të mëngjesit, disa bashkatdhetarë na thanë qartë:
“Edhe falas po të ishte, s’e kisha shkelë tokën e Serbisë.”
Kjo dëshmon se për shumë të tjerë, historia dhe ndjenjat ndaj vendit pritës janë më të forta se sa kursimi financiar.
E vërteta është se mërgimtari, sado që të largojë rrugët, nuk largohet nga atdheu. Shumë prej tyre po bëjnë udhëtime të gjata me vetura – 30 deri në 40 orë rrugë – sepse kështu u del më lirë. Por kjo nuk i ndal. Ata kthehen, çdo vit, për të parë prindërit, të afërmit, fëmijët e tyre të rriten me rrënjë shqiptare.
Pushime të mbara mërgatës sonë. Udhëtimi ju qoftë i mbarë, paçit rrugë të lehta dhe përqafime të ngrohta në atdhe.
SAM24.info