Kultura e një kombi rreh në zemrën dhe shpirtin e popullit të tij – aty ku lind, rritet dhe ruhet identiteti.
Për ne, kjo zemër është Ansambli i Këngëve dhe Valleve “TROJET”.
Për 12 vite me radhë, misioni ynë ka qenë i qartë dhe i pandryshueshëm: të ruajmë, të kultivojmë dhe të trashëgojmë me dashuri vlerat tona kombëtare përmes këngës, valles, gjuhës, kostumeve dhe ndjenjës së përbashkët që quhet atdhe.
Me aktivitetin simbolik “Dyert e Hapura”, mbajtur më 23 maj 2025, deshëm të ndajmë me miqtë, prindërit dhe përkrahësit tanë një pamje të brendshme të punës që bëhet në këtë vatër shpirtërore.
Ndonëse të kufizuar në numër, ishim të pasur në përmbajtje. Ishte një ditë e thjeshtë në formë, por e madhe në mesazh, sepse u pa nga afër përkushtimi i secilit anëtar – të vegjël e të rritur – në shërbim të një ideali të përbashkët: krenaria për prejardhjen dhe kultura jonë kombëtare.
Ansambli TROJET nuk është thjesht një ansambël.
Është një familje shpirtërore, një urë që lidh breza, një dritare që hapet çdo javë për fëmijët tanë, aty ku ata mësojnë të duan veten, njëri-tjetrin dhe rrënjët e tyre.
Në këtë udhëtim kulturor, përfitimi është i dyfishtë: artistik në skenë dhe shoqëror në jetën e përditshme.
Fëmijët e TROJEVE rriten me vetëbesim, me ndjenjë komuniteti dhe me një pasuri shpirtërore që do ta bartin gjithë jetën.
Në këtë aktivitet të shënuar u nderuam me pjesëmarrjen e shumë personaliteteve të shquara të komunitetit tonë, të cilët me praninë dhe mbështetjen e tyre i dhanë kësaj mbrëmjeje një dimension të veçantë dhe të paharrueshëm.
Ndër ta ishin:
• Zv. Konsulli Avni Zejnullahu,
• Prof. Dr. Xhavit Lipaj,
• figura të njohura të artit dhe kulturës shqiptare si
• Sami Kuqi,
• Premtim Sermaxhaj, drejtor i Albradio,
• Urhan Spahiu, avokat,
• dhe zonja Hava Shala – të cilët me prezencën e tyre e begatuan këtë mbrëmje dhe na nderuan të gjithëve.
Një përgëzim i veçantë i shkon grupit tonë artistik, në veçanti Donjetës dhe Ensarit, për punën profesionale dhe dashurinë që u japin tri grupmoshave që mbajnë gjallë frymën e vallëzimit tradicional.
Po ashtu, shprehim mirënjohjen më të sinqertë për kryesinë e ansamblit, për grupin punues, për prindërit që qëndrojnë pranë fëmijëve, dhe për mbështetësit tanë të shumtë – që me praninë, fjalët dhe veprimet e tyre na e bëjnë rrugën më të lehtë.
Falënderime të përzemërta për:
. Portalin e respektuar, sam24.info
• Familjen Vinca,
• House of Grill për mikpritjen e ngrohtë – https://houseofgrill.ch
• dhe Nora Photography – https://nora-photography.ch
Të bashkuar rreth vlerave tona, jemi gjithmonë më të fortë.
Kjo mbrëmje na dëshmoi edhe një herë se aty ku ka përkushtim, ka shpresë dhe të ardhme.
Ju përqafojmë me shumë respekt dhe mirënjohje të thellë.
Me dashuri dhe krenari,
Ansambli “TROJET”
SAM24.info