Carlo Ancelotti ka folur për herë të parë pas njoftimit zyrtar për largimin nga Real Madrid, duke ndarë emocionet e fundit si trajner i “Los Blancos”. Italiani, një nga trajnerët më të suksesshëm në historinë e klubit, u shpreh me mirënjohje për aventurën që po mbyllet, ndërsa u ndal te momentet e paharrueshme dhe suksesi i arritur gjatë dy periudhave në “Santiago Bernabéu”.
“Futbolli, ashtu si jeta, është një aventurë që fillon dhe përfundon. Një periudhë e bukur po merr fund dhe nuk pendohem për asgjë,” – u shpreh Ancelotti. “Nëse ditën që erdha këtu do të më thoshin se do fitoja 11 trofe, do e kisha pranuar menjëherë. Kam dhënë gjithçka që kam pasur dhe rezultatet flasin vetë.”
Ancelotti theksoi se ndarja ishte një vendim i përbashkët dhe i qetë, duke falënderuar klubin për besimin dhe mbështetjen:“Asnjëherë nuk kam ndjerë se nuk isha i dëshiruar nga Real Madrid. Ishte momenti për ndryshim. Një mijë falënderime për këtë klub – do të mbetem tifoz i Real Madridit gjithë jetën.”
Tekniku italian u ndal edhe te ndjesitë personale: “Nuk e kisha menduar kurrë se do të qëndroja gjashtë vjet te Real Madrid. Nuk ka qenë gjithmonë e lehtë, por ka pasur momente që nuk do t’i harroj kurrë – dhe jam i bindur që as tifozët.”
Pas ndeshjes ndaj Mallorca-s, e cila shënon një nga të fundit si madrilen, Ancelotti do të nisë më 26 maj aventurën e re si trajner i kombëtares së Brazilit, duke hapur një kapitull të ri në karrierën e tij të lavdishme./KJ