Konferenca e 10-të Ndërqeveritare Shqipëri–Bashkimi Evropian mbahet në Luksemburg, ku në fokus do të jetë Kapitulli 20, që lidhet me ndërmarrjet dhe politikat industriale.
Shqipëria pritet të shënojë një tjetër hap në procesin e anëtarësimit në Bashkimin Evropian. Në Luksemburg do të zhvillohet sot Konferenca e 10-të Ndërqeveritare Shqipëri–BE, ku pritet të formalizohet mbyllja e negociatave për Kapitullin 20, që përfshin ndërmarrjet dhe politikat industriale.
Në këtë konferencë do të marrë pjesë kryeministri shqiptar, Edi Rama, i cili e ka bërë të ditur zhvillimin përmes një postimi në rrjetet sociale.
“Mirëmëngjes … dhe me lajmin se sot në Luksemburg, Shqipëria hedh një tjetër hap drejt Bashkimit Europian, duke mbyllur Kapitullin 20 në Konferencën e 10-të të negociatave të Anëtarësimit në BE, ju uroj një ditë të mbarë”, ka shkruar Rama.
Kapitulli 20, i titulluar “Ndërmarrjet dhe Politikat Industriale”, është pjesë e procesit të përafrimit të politikave dhe legjislacionit shqiptar me standardet e Bashkimit Evropian. Ai përfshin politikat që synojnë zhvillimin e konkurrueshmërisë së ndërmarrjeve dhe krijimin e kushteve të përshtatshme për zhvillimin industrial.
Mbyllja e këtij kapitulli do të përbënte një tjetër zhvillim në rrugëtimin evropian të Shqipërisë, e cila po vijon negociatat e anëtarësimit me institucionet e Bashkimit Evropian.
Procesi i negociatave synon përafrimin e legjislacionit, institucioneve dhe politikave të vendit me kërkesat e BE-së, në funksion të përmbushjes së kritereve për anëtarësim.
Konferenca e sotme në Luksemburg pritet të shërbejë si një tjetër moment i rëndësishëm në avancimin e këtij procesi, ndërsa Shqipëria synon të përparojë në përmbushjen e detyrimeve që lidhen me anëtarësimin në familjen evropiane, transmeton rtk.
