Në kuadër të përpjekjeve për reformimin dhe përafrimin e institucioneve shqiptare me standardet e Bashkimit Evropian, Drejtori i Përgjithshëm i Burgjeve, Klevis Qose, ka zhvilluar një vizitë zyrtare në Bruksel. Gjatë kësaj vizite, ai ka zhvilluar një takim të rëndësishëm pune me homologen e tij belge, Mathilde Steenbergen, Drejtoreshë e Përgjithshme e Administratës Penitenciare të Belgjikës.
Ky takim shënon hapjen e një kapitulli të ri në marrëdhëniet dypalëshe mes dy institucioneve, duke vendosur theksin te shkëmbimi i ekspertizës dhe përmirësimi i kushteve të sigurisë dhe rehabilitimit në sistemin e vuajtjes së dënimit.
Sipas njoftimit zyrtar nga kreu i institucionit shqiptar, bisedimet u përqendruan në ngritjen e një ure të qëndrueshme bashkëpunimi ndërinstitucional. Synimi kryesor është importimi dhe zbatimi i praktikave më të mira evropiane në Shqipëri.
Diskutimet u udhëhoqën nga nevoja për të përafruar protokollet e punës së administratës së burgjeve me standardet strikte të përcaktuara nga Këshilli i Evropës, të cilat garantojnë jo vetëm sigurinë e lartë, por edhe respektimin e të drejtave të njeriut dhe trajtimin dinjitoz të personave të privuar nga liria.
Një pjesë e rëndësishme e agjendës së takimit i është kushtuar problematikave të përbashkëta me të cilat përballen sistemet e burgjeve në mbarë botën sot. Gjatë bisedës, palët kanë ndarë qasje dhe ide konkrete mbi menaxhimin e sfidave të tilla si parandalimi i fenomeneve negative. zhvillimi i strategjive të reja për të shmangur radikalizimin, dhunën apo aktivitetet e paligjshme brenda institucioneve të vuajtjes së dënimit; përshtatja e infrastrukturës dhe trajnimi i stafit për të përballuar mbipopullimin dhe për të ofruar programe më efikase rehabilitimi dhe riintegrimi në shoqëri.
Kreu i Drejtorisë së Përgjithshme të Burgjeve, Klevis Qose, e vlerësoi këtë tryezë si një moment kyç për institucionin që ai drejton.
“Takimi shërbeu si një hap i rëndësishëm drejt forcimit të bashkëpunimit dhe shkëmbimit të ekspertizës në funksion të modernizimit dhe zhvillimit të sistemit të burgjeve,” nënvizoi Qose pas përfundimit të takimit, transmeton rtsh.
