Nga Dashnim HEBIBI
Wallisellen, 07 dhjetor 2025 – Sot u mbajt me sukses turniri i futbollit në sallë, organizuar nga Shoqata Koretini në Zvicër, ku morën pjesë 20 ekipe nga të gjitha trevat shqiptare. Turniri u zhvillua në një atmosferë të shkëlqyer sportive, me shumë fair-play dhe pjesëmarrje të gjerë të sportdashësve të mërgatës. Ndeshjet u drejtuan nga 4 gjyqtarë, të cilët u përkujdesën që gara të jetë korrekte dhe profesionale.
Të pranishëm figura të njohura të jetës publike dhe sportive
Turnirin e nderuan me praninë e tyre:
- Kadri Rahimaj, Kryetar i Komunës së Kamenicës,
- Vaxhid Rexhepaj, Shef i Kabinetit,
- Milaim Limoni, përfaqësues i OVL-UÇK, dega në Kamenicë.
Sipas informacioneve të siguruara nga HelveticALforum, në turnir ishin të pranishëm edhe:
- Vigan Berisha, Shef i Misionit Konsullor të Kosovës në Cyrih,
- Milaim Rama, një ndër futbollistët shqiptarë më të njohur në Zvicër dhe futbollisti i parë shqiptar që ka luajtur për Kombëtaren Zvicerane.
Pjesëmarrja e tyre i dha turnirit një dimension të veçantë, duke e bërë ngjarjen edhe më të rëndësishme për komunitetin shqiptar në Zvicër.
- Atmosferë shembullore sportive
Turniri është vlerësuar nga pjesëmarrësit dhe mysafirët si një aktivitet model, që jo vetëm i bashkon shqiptarët, por edhe promovon sportin, shoqërimin dhe kulturën e respektit. Organizatorët falënderuan të gjitha ekipet për disiplinën, lojën e ndershme dhe energjinë pozitive gjatë të gjithë ditës.
Detajet e fituesit dhe zhvillimet e ndeshjeve do të publikohen së shpejti në një shkrim të veçantë për lexuesit e HelveticALforum.ch.
