Një zhvillim i rëndësishëm ka ardhur nga Kongresi Amerikan, ku kongresisti republikan Brian Mast ka paraqitur një amendament me synim që të bëjë anëtarësimin e Kosovës në NATO një prioritet kyç të politikës së jashtme amerikane në Ballkan.
Ky propozim vjen në një moment kur bisedimet dhe marrëdhëniet në rajon janë në qendër të vëmendjes ndërkombëtare. Amendamenti i paraqitur nga Mast përfshin disa pika të rëndësishme, të cilat synojnë të përshpejtojnë integrimin euro-atlantik të Kosovës dhe të thellojnë bashkëpunimin me Shqipërinë.
Pikat kryesore të amendamentit
Prioritet në emërimin e ambasadorëve
Amendamenti kërkon që SHBA-ja të japë prioritet në emërimin e ambasadorëve në vendet e Ballkanit Perëndimor si Mali i Zi, Kosova dhe Bosnja e Hercegovina, duke dërguar një mesazh të qartë të angazhimit amerikan.
Mbështetje për pavarësinë dhe integrimin
Përveç njohjes së pavarësisë së Kosovës, ai kërkon që SHBA-ja të marrë rekomandime konkrete për të mbështetur dhe ndihmuar Kosovën në rrugën e saj drejt anëtarësimit në NATO.
Forcimi i mbrojtjes rajonale
Kongresisti ka propozuar gjithashtu që Shqipëria dhe Kosova të inkurajohen të zhvillojnë industritë e tyre të mbrojtjes dhe të rrisin shpenzimet për mbrojtjen kombëtare, në përputhje me standardet e NATO-s.
Nxitje e Serbisë për distancim
Një pikë tjetër e rëndësishme është nxitja e Serbisë për të zvogëluar ose ndërprerë lidhjet strategjike me Rusinë dhe Kinën.
Përforcimi i sigurisë kufitare
Amendamenti mbështet ndihmën e vazhdueshme të SHBA-së për sigurinë kufitare të Kosovës, duke përfshirë përdorimin e teknologjisë moderne të skanimit në pikat kufitare si ajo e Merdares.
Riafirmimi i pranisë ushtarake amerikane
Së fundmi, amendamenti riafirmon praninë e trupave amerikane në Kosovë, duke e cilësuar atë si një shtyllë jetësore për sigurinë rajonale. Mbetet të shihet se si do të ecë ky amendament në procesin legjislativ të Kongresit Amerikan, transmeton rtsh.
