Pas raportimeve për abuzim fizik dhe psikologjik të stafit, Rene Rexhepi, shefi i njohur i kuzhinës së restorantit me famë ndërkombëtare ‘Noma’ ka njoftuar se ka dhënë dorëheqje.
Ai gjithashtu ka bërë të ditur se do të largohet edhe nga Bordi i organizatës jofitimprurëse MAD, e cila merret me ndërtimin e komunitetit të kuzhinierëve dhe inovacionin gastronomik.
Ky njoftim vjen pas një serie akuzash të risjella në publik për abuzim fizik dhe verbal në kuzhinën e Noma-s, si dhe pas një proteste të mbajtur të mërkurën jashtë lokalit të përkohshëm të Noma-s në Los Anxhelos.
Akuzat filluan të shfaqen në Instagram muajin e kaluar, kur ish-punonjësi i Noma-s, Jason Ignacio White, publikoi historitë e ish-kolegëve të tij. Raporti i New York Times jep detaje për abuzimet e dyshuara të kryera nga Rexhepi gjatë viteve 2009–2017 ndaj punonjësve, përfshirë grushte në fytyrë, shpim me vegla kuzhine, përplasje për muri, intimidim dhe kërcënime për hakmarrje.
Në një deklaratë në Instagram, Rexhepi pranoi gabimet e së kaluarës, duke shkruar:
“Një falje nuk është e mjaftueshme. Unë marr përgjegjësi për veprimet e mia”. Ai shtoi se ekipi drejtues i Noma-s është më i fortë dhe më frymëzues se kurrë, dhe se pika e re në Los Anxhelos do të ishte një mundësi për të nxjerrë në pah reformat kulturore të restorantit.
Zbulimet shkaktuan pasoja të shpejta, me American Express dhe kompaninë e mikpritjes Blackbird që i ndërprenë lidhjet me Noma-n përpara se restoranti të hapej në Los Anxhelos.
Raporti i New York Times, bazuar në intervistat me 35 ish-punonjës, përshkroi një model ndëshkimi fizik dhe traumë të qëndrueshme nga shtresat e abuzimit psikologjik, duke përfshirë frikësimin, talljen publike dhe kërcënimet që prekin familjet dhe karrierën e punonjësve.
Megjithatë, pika e re e restorantit Noma, e hapur në Los Anxhelos mbetet mjaft tërheqëse për vizitorët. Pavarësisht këtij skandali, biletat e Noma-s për pikën në Los Anxhelos, me çmim 1,500 dollarë për një vend, u shitën brenda tre minutash, duke vënë në pah tërheqjen e qëndrueshme ndërkombëtare të këtij brendi.
Rene Rexhepi ka lindur në Kopenhagen (në vitin 1977), por babai i tij është shqiptar nga Maqedonia e Veriut, përkatësisht nga fshati Xhepçisht i Tetovës.
Gjatë fëmijërisë, ai ka kaluar periudha të gjata në Tetovë, teksa në intervista të ndryshme ka deklaruar se pushimet e verës në fshatin e babait, afërsia me natyrën dhe ushqimi i thjeshtë e organik i asaj zone, kanë pasur një ndikim të madh në filozofinë e tij të gatimit, transmeton rtk.
