Personaliteti i njohur i fushës së shkencave politike, gazetarisë dhe diplomacisë kulturore, Dr. Dashnim Hebibi, ka arritur një tjetër sukses të rëndësishëm në karrierën e tij shumëvjeçare. Me mbi tre dekada përvojë në gazetari profesionale dhe një angazhim të pandërprerë në promovimin e fjalës së lirë, ai është nderuar së fundmi me një mirënjohje të veçantë nga një revistë prestigjioze amerikane me seli në Florida, SHBA.
Dr. Hebibi, i cili mban titullin doktor i shkencave politike dhe ushtron një rol të rëndësishëm si president i Institutit Shkencor Helvetik të Evropës Juglindore me qendër në Cyrih të Zvicrës, e ndau këtë lajm të gëzueshëm me miqtë, kolegët dhe bashkëpunëtorët e tij kudo që ndodhen. Përmes një mesazhi publik, ai shprehu mirënjohjen e tij të thellë për këtë vlerësim, duke e cilësuar atë si rezultat të punës së palodhshme dhe përkushtimit të vazhdueshëm ndër vite.
“Suksesi vjen si rezultat i punës dhe përkushtimit të vazhdueshëm,” theksoi ai, duke falënderuar editorin dhe të gjithë stafin e revistës për vlerësimin dhe respektin e treguar ndaj krijimtarisë dhe angazhimit të tij profesional.
Një falënderim i veçantë nga ana e tij iu drejtua znj. Angela Kosta, të cilën ai e përshkroi si një “shpirt të bardhë dhe ambasadore të vlerave kulturore”. Sipas tij, kontributi i saj ka qenë vendimtar në promovimin e shkrimeve të tij në revista të njohura evropiane dhe botërore, duke i dhënë hapësirë fjalës së lirë dhe krijimtarisë poetike që buron nga ndjenja e thellë shpirtërore.
Në thelb të krijimtarisë së Dr. Hebibit qëndron dashuria për vendlindjen dhe identitetin kombëtar. Në shkrimet e tij, ai shpesh shpreh mallin dhe përkushtimin ndaj Preshevës, si dhe ndaj trevave shqiptare të Preshevës, Bujanocit dhe Medvegjës. Ai i konsideron këto hapësira si pjesë të pandashme të trungut kombëtar shqiptar dhe burim të pashtershëm frymëzimi për veprën e tij.
“Këto troje, me historinë dhe identitetin e tyre, mbeten burim frymëzimi dhe krenarie për mua,” u shpreh ai, duke rikujtuar lidhjen e fortë shpirtërore dhe kulturore me vendlindjen.
Ky vlerësim i fundit ndërkombëtar përbën një tjetër dëshmi të rëndësishme të kontributit të Dr. Dashnim Hebibit në fushën e gazetarisë, diplomacisë kulturore dhe promovimit të fjalës së lirë. Ai mbetet një zë i fuqishëm i intelektualizmit shqiptar në diasporë dhe një urë lidhëse mes kulturave dhe hapësirave të ndryshme akademike e mediatike.
Në përfundim të mesazhit të tij, ai shprehu falënderimet më të sinqerta për të gjithë ata që e kanë mbështetur në rrugëtimin e tij profesional dhe krijues, duke e ndarë këtë sukses me familjen, miqtë dhe bashkëpunëtorët e tij.
Ky nderim i ri jo vetëm që vlerëson punën e tij individuale, por njëkohësisht promovon vlerat e gazetarisë së mirëfilltë, kulturës dhe identitetit shqiptar në arenën ndërkombëtare, transmeton helveticALForum.ch
