Në emisionin “3D” të moderuar nga Alban Dudushi në RTSH 1HD, tema e mbrëmjes ishte Dita e Pavarësisë, ku u diskutua mbi rrugëtimin historik, sakrificat dhe të ardhmen e Shqipërisë në procesin e integrimit europian.
Studiuesi Ben Andoni theksoi se shqiptarët shpesh nuk e kuptojnë madhështinë e kësaj feste, duke e cilësuar 28 Nëntorin si “festën mbi festa”.
Ai u shpreh se kjo ditë duhet të afrojë shqiptarët me vendin e tyre dhe të shërbejë si moment paqëtimi.
Ndërkohë, historiani Dritan Egro ngriti shqetësimin se Shqipërisë i mungon një Panteoni kombëtar, një vend ku të prehen firmëtarët e Pavarësisë dhe personalitetet që ndërtuan shtetin shqiptar me shumë vështirësi.
“Duhet të kemi një prani vizive, një vend ku qytetarët të vizitojnë dhe të nderojnë këta figura,” tha Egro.
Idenë e tij e mbështeti edhe profesori Paskal Milo, i cili theksoi se në kryeqytet duhet të ekzistojë një monument i denjë për themeluesin e shtetit shqiptar, Ismail Qemalin.
“Jo atë që është marrë nga Muzeu Kombëtar me rastin e 100-vjetorit dhe u vendos aty. Kjo është e pafalshme për të gjitha administratat pas vitit 1990, dhe kjo duhet bërë,” u shpreh Milo.
Debati në “3D” solli në vëmendje jo vetëm rëndësinë e Ditës së Flamurit si festë përbashkuese, por edhe domosdoshmërinë e nderimit të figurave historike me monumente dhe institucione të përhershme që pasqyrojnë kujtesën kombëtare, transmeton rtsh.
