Nga Drita OSMANI, PRESHEVË
Merrja një gurë Qytetit të Gurtë e po ia marrë një tjetër Mollës së Kuqe e me ta të ndërtojmë Kalanë Tonë.
Le të na kenë të gjithë lakmi.Ta rindërtojmë atë që na e prishën historikisht gjatë shekujve.
Ta mbrojmë si sytë…
A nuk është bukur?!
Brenda saj le të flitet më e vjetra e më e ëmbla gjuhë.
Drini le të na e sjellë Strugën e Ohrin e bashkë me Radikën le të vijë Dibra e Uskana.
Preveza le të vijë me valën e parë e ti bëj të fala Arbëreshëve t’ia thonë këngës ‘E bukura More’ që ta dëgjojë edhe Zara e Arvaniti më i vogël.
Ulqini t’a hedhë vallen e Peshkatarëve.
‘Vallja e Rugovës’ le të bëj që ti vlojë shqip zemra vëllezërve tanë në Pazarin e Ri.
Le të na duartrokas Agroni e Teuta.
Mbreti Bardhyl e Gjergji ynë kësaj here le t’i mbledhin ushtarët më të përzgjedhur e le të ndezin zjarr festiv që mos të ketë të ftohtë as Luli i Vocërr.
Le të na buzëqeshë Nëna Terezë, si jetimave e varfënjakëve të Kalkutës.
Ademi le të pushoj i qetë përgjithmonë!
Të përdhunuarat le ti veshë petku më i bukur.
Burrneshat e kohës le të qëndrojnë në krye të vendit e t’ia heqim atë mallkim të kohës.
Le të gjejë paqe Plaku nga “Njeriu prej Dheut” bashkë me eshtrat e gjithë shqipeve të Anadollit e të Stambollit.
Më thuaj me toskërishten tënde ‘Të dua’ që të të them me gegnishten time ‘ t’du ‘.
Eja!
T’ia kthejmë Shkumbinit rrjedhën e të mos ketë ndarje në Toskë e Gegë.
Rozafa le ta përkundë frytin e kësaj dashurie.
Pastaj, le të gurosem në themelet e kësaj Kalaje.
Le të gurosem njëherë,
që ajo të qëndrojë në këmbë përgjithmonë!
