Nga Beqir SINA, New York
Fort Leavenworth, Kansas – Më 15 janar 2026, Ministri i Mbrojtjes i Republikës së Kosovës, Ejup Maqedonci, u nderua me përfshirje në International Hall of Fame të U.S. Army Command and General Staff College (CGSC), duke u bërë një nga personalitetet e shquara ndërkombëtare që kanë përfunduar kursin e oficerëve të komandës dhe shtabit (CGSOC) klasa 2013.
Ceremonia solemne u mbajt në ambientet e Kolegjit në Fort Leavenworth, ku u zbulua portreti i Maqedoncit në galerinë e nderuar, iu dorëzua certifikatë zyrtare për arritje të jashtëzakonshme në udhëheqje ushtarake dhe kontribut ndërkombëtar.
Ngjarja u transmetua drejtpërdrejt në kanalin YouTube të CGSC-së dhe u shoqërua me fjalime nga udhëheqësit e institucionit, të cilët theksuan rolin e Maqedoncit në forcimin e bashkëpunimit Kosovë–SHBA dhe zhvillimin e Forcave të Sigurisë së Kosovës (FSK) sipas standardeve moderne të NATO-s.
Ky nderim nuk është i pari për Maqedoncin. Vetëm tre muaj më parë, më 14 tetor 2025, ai u përfshi edhe në Sallën e Famës të U.S. Army War College në Pensilvani një tjetër dëshmi e njohjes së karrierës së tij të gjatë, që fillon nga radhët e Ushtrisë Çlirimtare të Kosovës (UÇK), kalon nëpër strukturat e KFOR-it dhe arrin në postin e lartë ministerial.
Për Kosovën, ky moment përforcon imazhin si partner i besueshëm dhe i aftë në arenën ndërkombëtare të sigurisë. Maqedonci vetë e quajti nderimin “mirënjohje për popullin dhe shtetin e Kosovës”, duke nënvizuar se suksesi personal lidhet ngushtë me përkushtimin ndaj reformave dhe aleancave strategjike.
Ceremonia nxori në pah vlerat që promovon CGSC: udhëheqje profesionale, bashkëpunim ndërkombëtar dhe kontribut në paqe globale. Me këtë përfshirje, Maqedonci shton emrin e Kosovës në listën e figurave të shquara nga vende të ndryshme që kanë lënë gjurmë në arsimin ushtarak amerikan.
Ky nderim vjen në një kohë kur Kosova po forcon kapacitetet mbrojtëse dhe po synon integrim të mëtejshëm euro-atlantik një sinjal i qartë se puna e vazhdueshme dhe partneriteti me SHBA-në japin rezultate konkrete.
Në njoftim në faqen e tij sot Ministri Ejup Maqedonci ka një status ku shkruan se ka takuar përfaqësuesit e Organizatës së Veteranëve Amerikanë të Luftërave të Huaja (Veterans of Foreign Wars – VFW), znj. Carol Whitmore, Komandante Nacionale e VFW-së, dhe z. Ryan Gallucci, Drejtor Ekzekutiv i Zyrës së Uashingtonit të VFW-së të Shteteve të Bashkuara.
Kjo organizatë ka rreth 1.5 milionë anëtarë dhe është një nga organizatat më të mëdha dhe më me ndikim të veteranëve në SHBA.
“Diskutuam për lidhjen e fortë ndërmjet Republikës së Kosovës dhe Shteteve të Bashkuara, të ndërtuar mbi vlera të përbashkëta, sakrificë dhe partneritet strategjik. Shpreha mirënjohjen time të thellë për shërbimin e tyre në Kosovë dhe për mbështetjen e vazhdueshme të veteranëve amerikanë ndaj Kosovës” shkruan Ministri i Mbrojtjes së R. Kosovës Ejup Maqedonci. /BS
