Milani ka marrë një fitore të rëndësishme 1-0 ndaj Lazios në ndeshjen e javës së 13-të në Serinë A, duke u ngjitur i vetëm në krye të renditjes, të paktën për një natë, në pritje të supersfidës Roma–Napoli. Pjesa e parë ishte nën nivelin e duhur për kuqezinjtë, të cilët u rrezikuan seriozisht në të paktën dy raste dhe duhet të falënderojnë Mike Maignan, që edhe një herë mbajti skuadrën në lojë.
Në pjesën e dytë, ekipi i drejtuar nga Massimiliano Allegri ndryshoi ritëm: Milani rriti presionin, fitoi terren dhe pas vetëm pak minutash gjeti golin e avantazhit. Një aksion i shpejtë në krahun e majtë u finalizua me asistin e Tomorit dhe zhytjen e Rafael Leao-s nga dy hapa larg portës.
Pasi zhbllokuan ndeshjen, kuqezinjtë administruan me qetësi, pa lejuar rreziqe deri në fundin e tensionuar. Arbitri Collu u thirr në VAR për një prekje të mundshme me dorë të Pavloviqit në zonë, çka solli kaos pranë pankinave. U përjashtuan Allegri dhe zëvendëstrajneri i Sarrit, Ianni. Pas rishikimit të gjatë, arbitri vlerësoi se prekja e topit nuk ishte e dënueshme për shkak të një faulli të Marusic-it ndaj serbit.
Në fund, Milani mori tri pikë të arta dhe regjistroi ndeshjen e dymbëdhjetë rresht pa humbje. Tani vëmendja zhvendoset te “Olimpico”: sfida Roma–Napoli e së dielës mund t’u japë kuqezinjve konfirmimin zyrtar të kreut të tabelës./BS
