Presidentja e Kosovës, Vjosa Osmani, në seancën solemne të Kuvendi i Kosovës me rastin e 28-vjetorit të Epopesë së Ushtria Çlirimtare e Kosovës, theksoi simbolikën e veçantë që muaji mars ka në historinë shqiptare. Ajo kujtoi sakrificën dhe qëndresën e luftëtarëve që më 5, 6 dhe 7 mars të vitit 1998 ndryshuan rrjedhën e historisë së Kosovës.
Në fjalimin e saj, Osmani u ndal te ngjarjet që ndodhën në Prekaz, ku në zemër të kësaj treve, sipas saj, historia mori një drejtim të ri. Ajo përmendi qëndresën heroike të komandantit legjendar të UÇK-së, Adem Jashari, dhe familjes së tij, të cilët zgjodhën sakrificën për liri përpara përkuljes.
“Ata zgjodhën lirinë para frikës dhe mbi të gjitha zgjodhën nderin para jetës,” deklaroi Osmani, duke theksuar se tri ditët e marsit u shndërruan në simbol të epopesë dhe sakrificës që mobilizoi një popull të tërë.
Presidentja nënvizoi se kullat e familjes Jashari në Prekaz u kthyen në simbol të përhershëm të lirisë. Sipas saj, qëndresa e asaj familjeje u bë frymëzim për mbarë Kosovën dhe për gjithë kombin shqiptar.
Ajo rikujtoi se 5, 6 dhe 7 marsi përfaqësojnë momentin kur Kosova vendosi të mos jetojë e gjunjëzuar. “58 shpirtra u bënë dritë për një popull,” tha Osmani, duke shtuar se krismat e armëve në ato ditë nuk ishin vetëm zhurmë lufte, por një kushtrim për liri që zgjoi Drenicën, Kosovën dhe ndërgjegjen e botës.
Sipas saj, nga Prekazi nisi “orteku i lirisë” që u përhap në çdo fshat e qytet të Kosovës, duke shënuar fillimin e një epoke të re për vendin. Ajo e cilësoi Epopën e marsit jo vetëm si një kujtesë historike, por si një akt themelues të Republikës së Kosovës dhe momentin kur qëndresa e armatosur u shndërrua në zë politik të një populli që kërkonte lirinë dhe vendin e vet në botë.
Në përfundim të fjalës së saj, presidentja theksoi se Kosova ka një detyrim kombëtar dhe moral që kujtesën historike ta shndërrojë në vizion për të ardhmen. Ajo tha se emri i Adem Jashari dhe sakrifica e familjes së tij do të mbeten gjithmonë simbol i dinjitetit shtetëror dhe i luftës për liri.
“Liria nuk është dhuratë, por sakrificë. Shteti është përgjegjësi, ndërsa flamuri është amanet,” u shpreh Osmani, duke shtuar se ruajtja e këtij amaneti kërkon vendosmëri, vizion dhe përkushtim të vazhdueshëm për ndërtimin e një Kosove të fortë dhe të qëndrueshme për brezat që vijnë, transmeton rtk.
