Nga Dahest LUMA, Milano
PhD Dashnim Hebibi, i cili së fundmi u nderua në Romë me titullin e veçantë “Ambasador i Fjalës së Lirë”, ka njoftuar miqtë dhe ndjekësit e tij në rrjetet sociale se gjatë të njëjtës ngjarje të madhe kulturore evropiane, të njohur edhe për publikun përmes platformës HelveticAlForum, ka prezantuar dhe shpërndarë librin e ambasadorit të RMV-së në Zvicër, Rexhep Demiri, tek personalitete të larta italiane dhe evropiane.
Sipas njoftimit të tij, libri i ambasadorit Rexhep Demiri, me titull “Rexhep Demiri – Dritëhijet e një rrugëtimi diplomatik”, me bashkautorë, PhD Dashnim HEBIBI dhe Florim Useini e redaktor, Jeton Arifi dhe i realizuar teknikisht nga shtëpia botuese “Libri Im” në Pejë me editor Berat Thaçi, tashmë ndodhet në duart e shumë figurave të njohura të jetës diplomatike, akademike dhe kulturore në Itali dhe më gjerë në Evropë. Dorëzimi i librit u realizua në kuadër të aktivitetit të madh kulturor të mbajtur në Romë, ku morën pjesë përfaqësues të institucioneve, diplomatë, studiues dhe personalitete të shquara ndërkombëtare.
Kjo ngjarje shënoi një moment të rëndësishëm promovues për veprën, duke e bërë atë pjesë të diskutimeve dhe interesimit të qarqeve evropiane që ndjekin zhvillimet diplomatike dhe kulturore në rajon. Fotoja e realizuar gjatë aktivitetit në Romë pasqyron momentet e prezantimit të librit në një nga ngjarjet më të rëndësishme kulturore evropiane të këtij fillim viti.
