Kosova ka humbur një nga mbështetësit e saj më të mëdhenj në arenën ndërkombëtare. Ish-kongresisti amerikan Eliot Engel ka ndërruar jetë në moshën 79-vjeçare, duke lënë pas një trashëgimi të fuqishme në mbrojtje të të drejtave të njeriut dhe të çështjes së Kosovës.
Kryeministri i Kosovës, Albin Kurti, shprehu pikëllim të thellë për ndarjen nga jeta të Engelit, duke e cilësuar atë si një nga zërat më të fuqishëm në Kongresin amerikan kundër regjimit të Slobodan Milošević dhe krimeve të kryera gjatë luftës në Kosovë.
Në një mesazh të publikuar në platformën X, Kurti theksoi se Engel ishte ndër politikanët e parë amerikanë që kërkuan ndërhyrjen e NATO për të ndalur spastrimin etnik në Kosovë. Ai gjithashtu kujtoi rolin vendimtar të Engelit në mbështetjen e pavarësisë së vendit dhe në sigurimin e mbështetjes së gjerë në Kongresin amerikan për njohjen e saj në vitin 2008.
“Eliot Engel ishte përkujtuar prej kohësh në Kosovë, edhe para se një bulevard në Pejë të mbante emrin e tij,” u shpreh Kurti, duke shtuar se angazhimi i tij i palëkundur për drejtësi dhe demokraci e bëri atë një figurë të respektuar dhe të dashur për popullin e Kosovës.
Kurti vlerësoi gjithashtu se Engel kishte paralajmëruar vazhdimisht për ndikimet destabilizuese të Rusisë në Evropë dhe kishte qenë një zë i fortë në mbështetje të demokracisë dhe të drejtave të njeriut në nivel global.
“Ne e pranojmë këtë lajm me dhimbje të thellë, por edhe me mirënjohje të përhershme për kontributin e tij të jashtëzakonshëm,” deklaroi Kurti, duke theksuar se Engel do të mbetet përgjithmonë në kujtesën kolektive të Kosovës si një mik i sinqertë dhe një mbrojtës i palodhur i lirisë.
Vdekja e Eliot Engel shënon një humbje të madhe jo vetëm për Shtetet e Bashkuara, por edhe për Kosovën, e cila i detyrohet shumë angazhimit të tij në momentet më vendimtare të historisë së saj, transmeton rtk.
