Në një intervistë për RTV21, komandanti i KFOR, gjenerali Özkan Ulutaş, ka theksuar se misioni paqeruajtës i udhëhequr nga NATO vazhdon të kërkojë llogaridhënie për sulmet ndaj forcave paqeruajtëse në Banjskë gjatë vitit 2023, duke insistuar që përgjegjësit të përballen me drejtësinë.
Ulutaş nënvizoi se KFOR nuk ka qenë i përfshirë në asnjë negociatë të pretenduar për largimin e sulmuesve, duke theksuar se prioriteti i vetëm i misionit ka qenë rivendosja e sigurisë dhe stabilitetit në zonë pas incidenteve të armatosura.
Sipas tij, situata në veri të Kosovë mbetet stabile, por e brishtë. Ai përmendi zbulimin e armëve dhe municioneve si faktor që kërkon vigjilencë të shtuar dhe prani të vazhdueshme të forcave paqeruajtëse.
Gjenerali theksoi gjithashtu se Forca e Sigurisë së Kosovës mund të zhvillojë misione në veri vetëm me lejen e komandantit të KFOR-it, në përputhje me marrëveshjet ekzistuese. Ai konfirmoi se prania e trupave të KFOR-it mbi urën kryesore në lumin Ibër do të vazhdojë, së bashku me patrullime të rregullta në zonë për të garantuar sigurinë e të gjithë qytetarëve.
Në planin politik, Ulutaş rikonfirmoi mbështetjen e NATO-s për dialogun e lehtësuar nga Bashkimi Evropian ndërmjet Prishtinës dhe Beogradit, duke e cilësuar atë si kornizën e vetme për zgjidhjen e çështjeve të hapura. Ai theksoi rëndësinë e bashkëpunimit rajonal dhe respektimit të të drejtave të të gjitha komuniteteve.
Duke hedhur poshtë spekulimet për reduktim të pranisë amerikane, Ulutaş bëri të ditur se aktualisht nuk ka ndryshime të rëndësishme në përbërjen e KFOR-it. Ai rikujtoi se Shtetet e Bashkuara të Amerikës kontribuojnë me rreth 600 trupa në mision, duke luajtur rol kyç në sigurimin e qëndrueshmërisë dhe stabilitetit rajonal, përfshirë koordinimin me Policinë e Kosovës dhe EULEX.
Në përfundim, komandanti i KFOR-it nënvizoi se misioni i NATO-s mbetet i përqendruar në garantimin e një mjedisi të qetë dhe të sigurt për të gjithë qytetarët e Kosovës, duke mbështetur dialogun politik si rrugën e vetme për zgjidhjen e çështjeve të pazgjidhura dhe forcimin e stabilitetit afatgjatë në rajon./BS
