Italia po përjeton Lojërat Olimpike Dimërore më të suksesshme në historinë e saj, pasi ka arritur në 22 medalje dhe ka tejkaluar rekordin e mëparshëm prej 20 medaljesh të vendosur në vitin 1994. Në garat që po zhvillohen në Lojërat Olimpike Dimërore Milano‑Cortina 2026, ekipi vendas fitoi katër medalje brenda një dite, dy të arta, një të argjendtë dhe një të bronztë, ndërsa kanë mbetur ende disa ditë garash deri në përfundim të kompeticionit.
Mes protagonisteve ishte skiatorja Federica Brignone, e cila fitoi medaljen e saj të dytë të artë në sllallomin gjigant, vetëm një muaj pasi ishte rikthyer në gara pas një dëmtimi të rëndë. Po ashtu, biatletja Lisa Vittozzi siguroi medalje të artë në garën 10 kilometra, ndërsa ekipi italian fitoi edhe medalje në snowboard dhe ski nordik. “Po dëshmojmë diçka historike për atletët tanë të jashtëzakonshëm,” tha presidenti i komitetit organizativ Giovanni Malagò, raporton AP.
Suksesi i Italisë është shoqëruar edhe me histori frymëzuese, përfshirë atë të kampiones së short-track Arianna Fontana, e cila arriti medaljet e saj olimpike numër 12 dhe 13, duke barazuar rekordin historik për një sportist italian. Deri tani, Italia ka tetë medalje ari, katër argjendi dhe dhjetë bronzi, duke qëndruar ndër vendet kryesuese në tabelën e medaljeve dhe duke tejkaluar objektivin fillestar të vendosur para garave. /BS
