Në Kalanë e Krujës sot u instalua hotspoti i parë publik Wi-Fi, duke shënuar një risi dhe pikënisjen e një transformimi të rëndësishëm drejt një Shqipërie më të lidhur dhe më të aksesueshme për qytetarët dhe turistët. Ministri i Turizmit, Kulturës dhe Sportit, Blendi Gonxhja tha se në kuadër të iniciativës WiFi4WB, do të ofrohet internet falas dhe i besueshëm në hapësira publike. Gonxhja tha se kjo nismë përmirëson përvojën e vizitorëve dhe duke krijuar më shumë mundësi për komunikim, informim dhe zhvillim në kohë reale.
“Në Shqipëri, programi parashikon instalimin e 73 pikave publike Wi-Fi në 61 bashki të vendit, duke garantuar akses më të gjerë dhe më të barabartë në lidhje digjitale për komunitetet dhe vizitorët në të gjithë territorin”, tha Gonxhja.
Ministri Gonxhja theksoi se ky program, implementuar nga GIZ nëpërmjet projektit EU4Digital, bashkëfinancuar nga Bashkimi Europian dhe qeveria gjermane, synon shtrirjen e Wi-Fi publik në deri në 500 bashki në Ballkanin Perëndimor, duke përfaqësuar një hap të rëndësishëm drejt përshpejtimit të transformimit digjital dhe afrimit të rajonit me Tregun e Vetëm Digjital të Bashkimit Europian.
Ambasadori i BE-së në Shqipëri, Silvio Gonzato, theksoi rolin e lidhjes digjitale në forcimin e shërbimeve publike dhe në mbështetjen e rrugës së integrimit evropian të Shqipërisë. “WiFi4WB është një ide e thjeshtë me një ndikim të fuqishëm: internet falas në 61 bashki të Shqipërisë, duke krijuar akses në shërbime digjitale, informacion, mësim dhe komunikim për të gjithë. Ky projekt nuk ka të bëjë vetëm me lidhjen me internetin. Ai synon fuqizimin e komuniteteve, mbështetjen e zhvillimit vendor dhe afrimin e Ballkanit Perëndimor me Tregun Unik Digjital të BE-së”, u shpreh ambasadori Gonzato.
Ambasadori i Gjermanisë në Shqipëri, Karl Bergner, nënvizoi partneritetin e fortë midis Gjermanisë dhe Bashkimit Evropian në avancimin e transformimit digjital në rajon. “Digjitalizimi është një nga çështjet kryesore të kohës sonë. Ai mundëson shkëmbimin, informimin dhe frymëzimin. Duke ofruar ‘internet falas për të gjithë’ në qendrat kryesore të 61 bashkive, ne po hedhim një hap të madh përpara drejt aksesit të barabartë për të gjithë qytetarët shqiptarë”, u shpreh ambasadori Bergner.
Përfaqësues të qeverisë iu drejtuan gjithashtu të pranishmëve, duke theksuar ndikimin e nismës në qeverisje, shërbime publike dhe përfshirjen e qytetarëve.
“Wifi4WB do të thotë më shumë informacion dhe orientim për turistët, më shumë aksesueshmëri. Nga kjo iniciativë përfitojnë qytetarët, bizneset lokale dhe qendrat kulturore.
Muzeu në Kalanë e Krujës është një nga sitet kulturore më të vizituara në Shqipëri ku vetëm një vit më parë është vizitur nga rreth 200 mijë turistë. Prioritet kryesor për ne është turizmi gjatë gjithë vitit dhe sitet kulturore mbajnë peshën kyesore të turizmit gjithëvjetor”, u shpreh zëvendësministrja e Turizmit, Kulturës dhe Sportit, Lira Pipa.
Një moment i rëndësishëm i aktivitetit ishte nënshkrimi i Memorandumit të Mirëkuptimit mes GIZ dhe Bashkisë, duke formalizuar bashkëpunimin për instalimin, operimin dhe mirëmbajtjen afatgjatë të rrjetit WiFi4WB. Sonja Kurz, drejtore e GIZ Shqipëri, theksoi rëndësinë rajonale të nismës dhe modelin e saj të qëndrueshëm.
“GIZ mbetet e përkushtuar të punojë ngushtë me partnerët për të ofruar zgjidhje digjitale të qëndrueshme dhe gjithëpërfshirëse në të gjithë vendin. Përmes nismës WiFi4WB, ne po sigurojmë që çdo bashki të mund të ofrojë internet falas dhe të besueshëm në hapësirat publike, duke ndihmuar në reduktimin e hendekut digjital dhe duke i bërë shërbimet thelbësore online më të aksesueshme për të gjithë qytetarët”, u shpreh Kurz.
Operatori i telekomunikacionit Vodafone u përzgjodh përmes një tenderi publik të zhvilluar nga GIZ për të shtrirë dhe mirëmbajtur infrastrukturën Wi-Fi dhe për të ofruar shërbim interneti falas në vendndodhje publike të përcaktuara në të gjithë Shqipërinë
Nisma WiFi4WB do të përmirësojë aksesin në shërbime digjitale, arsim dhe informacion publik, duke mbështetur njëkohësisht bizneset e vogla, përmirësuar përvojën e vizitorëve dhe forcuar turizmin lokal. Duke siguruar internet falas dhe të besueshëm në hapësira publike, nisma promovon gjithashtu përfshirjen sociale dhe ndihmon në ngushtimin e hendekut digjital. Nisma WiFi4WB është pjesë e projektit EU4Digital, bashkëfinancuar nga Bashkimi Evropian dhe Qeveria Gjermane dhe i zbatuar nga GIZ, frymëzuar nga programi i BE-së WiFi4EU që lidh mbi 7000 komunitete në të gjithë Evropën.
Pas zbatimit të plotë të nismës, qytetarë dhe vizitorë do të mund të aksesojnë Wi-Fi falas në hapësira publike si sheshe, parqe, biblioteka, shkolla dhe site kulturore, në Shqipëri dhe në mbarë rajonin, transmeton oranews.
