Dje, në Konsullatën e Republikës së Kosovës në Cyrih, u mbajt një takim pune në kuadër të zbatimit të Marrëveshjes së 17 marsit 2024 për bashkimin e shkollave të gjuhës shqipe në Zvicër. Në takim morën pjesë Ambasadori i Republikës së Kosovës, z. Mentor Latifi; Ambasadori i Republikës së Maqedonisë së Veriut, z. Rexhep Demiri; Sekretari i Ambasadës së Republikës së Shqipërisë, z. Valon Gashi; si dhe Konsulli i Republikës së Kosovës në Cyrih, z. Vigan Berisha.
Të ftuar nga ana e tre ambasadave ishin bashkëkryetarët e Shkollës Shqipe – LAPSH “Naim Frashëri” në Zvicër, z. Vaxhid Sejdiu dhe z. Liburn Mehmetaj. I ftuar ishte gjithashtu edhe kryetari i LAPSH-it të Kantonit të Cyrihut, z. Naser Ulaj, i cili nuk mori pjesë.
Diskutimet u fokusuan në ecurinë e procesit të bashkimit të shkollave shqipe dhe në hapat e nevojshëm për përmbyllen e tij, veçanarisht në kantonin e Cyrihut.
Tre ambasadat riafirmuan angazhimin e tyre të plotë për të ndërmjetësuar dhe mbështetur përmbylljen e këtij procesi, në mënyrë që të krijohet një strukturë e vetme, funksionale dhe legjitime për mbarë Zvicrën.
U vlerësua puna e mësueseve dhe veprimtarëve që mbajnë gjallë gjuhën shqipe, si dhe zgjerimi i pikave të reja mësimore në disa kantone. Njëherazi u theksua rëndësia e bashkëpunimit dhe pjesëmarrjes të të gjitha palëve, përfshirë edhe Cyrihun, për të siguruar një proces të koordinuar dhe të suksesshëm.
LAPSH mbetet i përkushtuar që mësimi plotësues të jetë i unifikuar, i qëndrueshëm dhe në shërbim të fëmijëve dhe komunitetit shqiptar në Zvicër, njofton Ambasada e Republikës së Kosovës në Zvicër, transmeton helveticALforum.ch
