Ministrja e Drejtësisë dhe Zëvendëskryeministrja e Kosovës, Donika Gërvalla, ka marrë pjesë në festimin e 18-vjetorit të Pavarësisë së Kosova në Hamburg, ku organizimi u realizua nga Konsullata e Republikës së Kosovës në Hamburg.
Në një postim publik, Gërvalla theksoi rëndësinë e lidhjeve të forta me miqtë ndërkombëtarë dhe me komunitetin kosovar jashtë vendit, duke e cilësuar diasporën si një pjesë të pandashme të suksesit dhe forcës së shtetit të Kosovës.
“Kosova është edhe më e fortë kur feston me miqtë e saj, kudo në botë”, u shpreh ajo, duke përshkruar mbrëmjen si një ngjarje ku arti dhe kultura u shndërruan në gjuhë të fuqishme të diplomacisë.
Sipas saj, interpretimi brilant i mezzo-sopranos Flaka Goranci dhe pianistes Elda Laro, si dhe paraqitja skenike e artistëve të Trupa e Baletit Kombëtar të Kosovës, Luljeta Ademi dhe Fisnik Smani, e ngritën kulturën shqiptare në nivelin më të lartë të përfaqësimit ndërkombëtar.
Gërvalla falënderoi gjithashtu Konsullin e Kosovës në Hamburg, Mizbah Mustafa, dhe stafin e konsullatës për organizimin e suksesshëm të aktivitetit, si dhe komunitetin shqiptar për pjesëmarrjen dhe mbështetjen.
“Prania juaj, gëzimi, energjia dhe dashuria që dhatë e bënë këtë përvjetor edhe më të ngrohtë”, theksoi ajo.
Në përmbyllje të mesazhit të saj, ministrja vuri në pah rrugëtimin e Kosovës si shtet sovran dhe të qëndrueshëm, duke e cilësuar atë si një histori suksesi shtetndërtimi dhe një aleat të besueshëm në arenën ndërkombëtare. Ajo theksoi përkushtimin e vendit drejt së ardhmes euroatlantike, duke e përmbyllur me urimin: “Gëzuar ditën tënde dhe ditëlindjen e 18-të, Kosovë, shteti i lirë, i pavarur dhe demokratik.”
