Një kontingjent ushtarak nga Forcat e Armatosura të Republikës së Bullgarisë është nisur solemnisht për të marrë pjesë në misionin paqeruajtës të NATO-s në Kosovë (KFOR). Ceremonia e përcjelljes u zhvillua në qytetin Pleven, në prani të përfaqësuesve të lartë të udhëheqjes politike dhe ushtarake bullgare.
Kontingjenti bullgar do të angazhohet në kuadër të batalionit shumëkombësh të Komandës Rajonale “Perëndim” të KFOR-it, njofton Agjencia Telegrafike Bullgare (BTA).
Në fjalën e tij, zëvendësministri i Mbrojtjes, Radostin Iliev, theksoi se pjesëmarrja në këtë operacion përbën një detyrë me rëndësi të veçantë për ruajtjen e paqes dhe sigurisë në Ballkanin Perëndimor, si dhe për mbrojtjen e interesit kombëtar dhe sigurisë ndërkombëtare. Ai vuri në dukje se Bullgaria është një anëtare e besueshme e NATO-s dhe Bashkimit Evropian dhe se kontingjentet bullgare japin një kontribut të drejtpërdrejtë në stabilitetin e rajonit dhe të Evropës.
Iliev siguroi se kontingjenti gëzon mbështetjen e plotë të udhëheqjes politike dhe ushtarake të vendit, duke u uruar ushtarakëve mision të suksesshëm dhe kthim të sigurt.
Zëvendësshefi i Mbrojtjes, gjeneral-lejtnant Krasimir Kënev, deklaroi se në misionin KFOR marrin pjesë 33 shtete dhe se Bullgaria renditet ndër dhjetë vendet e para për nga kontributi me personel dhe detyra. Ai theksoi se për 26 vite rresht, kontingjentet bullgare kanë forcuar autoritetin ndërkombëtar të vendit, duke dëshmuar profesionalizëm dhe respektim rigoroz të rregullave për përdorimin e forcës dhe procedurave operative.
Gjatë ceremonisë, zëvendëskomandanti i Komandës së Përbashkët të Forcave, admiral flotilje Galin Manev, i dorëzoi shefit të shtabit të Komandës Rajonale “Perëndim”, nënkolonelit Donço Ignatov, certifikatën e gatishmërisë së kontingjentit për pjesëmarrje në misionin e NATO-s në Kosovë.
Në aktivitet mori pjesë edhe komandanti i Forcave Tokësore të Bullgarisë, gjeneral-major Dejan Deshkov, transmeton rtk.
