Uashington, D.C. – Ambasadori i Republikës së Kosovës në Shtetet e Bashkuara të Amerikës, z. Ilir Dugolli, u takua me Kongresisten amerikane Julie Johnson, në një takim të përqendruar në agjendën legjislative të Kongresit dhe forcimin e mëtejmë të marrëdhënieve dypalëshe ndërmjet Kosovës dhe Shteteve të Bashkuara.
Gjatë takimit, bashkëbiseduesit diskutuan për zhvillimet aktuale politike, prioritetet ligjvënëse në Kongres, si dhe për mundësitë e thellimit të bashkëpunimit në fusha me interes të përbashkët.
Ambasadori Dugolli vlerësoi mbështetjen e vazhdueshme të Kongresit amerikan për Kosovën dhe rolin e rëndësishëm të SHBA-së në avancimin e paqes, stabilitetit dhe zhvillimit demokratik në rajon.
Takimi u shënua gjithashtu me një shenjë mirënjohjeje nga Ambasadori Dugolli për Kongresisten Johnson, në frymën e festave të fundvitit, si simbol i vlerësimit për angazhimin dhe bashkëpunimin e saj.
Ambasada e Republikës së Kosovës në Uashington mbetet e përkushtuar në forcimin e partneritetit strategjik me Shtetet e Bashkuara dhe në intensifikimin e kontakteve me përfaqësuesit e Kongresit amerikan, njofton Ambasada e Republikës së Kosovës në Uashington, transmeton helveticALforum.ch
