Sot përkujtojmë përvjetorin e ndarjes nga jeta të Presidentit historik të Republikës së Kosovës, Dr. Ibrahim Rugova, figurë themelore e shtetformimit dhe vizionit politik shqiptar.
Trashëgimia e tij vazhdon të jetë udhërrëfyes edhe sot, në një kohë sfidash të reja për Kosovën dhe kombin shqiptar. Me mençuri, durim dhe vizion evropian, Presidenti Rugova ndërtoi themelet e diplomacisë kosovare dhe e vendosi çështjen e Kosovës në qendër të vëmendjes ndërkombëtare.
Ai besoi fuqishëm në lirinë, dinjitetin dhe orientimin euroatlantik, duke i qëndruar stoik represionit dhe padrejtësive, pa u larguar asnjëherë nga ideali i tij për një Kosovë të lirë dhe të pavarur.
Në këtë ditë kujtese, nderojmë veprën dhe filozofinë politike të Dr. Ibrahim Rugovës, si vlerë e përhershme e historisë sonë kombëtare.
Qoftë i përjetshëm kujtimi për Presidentin Ibrahim Rugova!
helveticALforum.ch
