Demokrati James Talarico ka fituar garën për Senatin amerikan në shtetin e Teksasit, duke mposhtur republikanin Ken Paxton në një prej rezultateve më të rëndësishme të zgjedhjeve të mesmandatit në SHBA.
Fitorja e Talarico shënon rikthimin e demokratëve në Senatin amerikan nga Teksasi, pas gati katër dekadash, që prej vitit 1988. Rezultati përbën një goditje për republikanët dhe për presidentin Donald Trump, i cili kishte mbështetur personalisht kandidaturën e Paxton.
Talarico, ish-mësues shkolle dhe ligjvënës në parlamentin e Teksasit, ishte një figurë relativisht pak e njohur në nivel kombëtar deri vitin e kaluar. Gjatë fushatës, ai vendosi në qendër të programit të tij rritjen e kostos së jetesës dhe ndikimin e politikave republikane në ekonominë e familjeve amerikane.
Nga ana tjetër, Paxton u përpoq ta paraqiste rivalin e tij si një kandidat tepër progresist për një shtet tradicionalisht konservator, duke zhvilluar disa aktivitete elektorale së bashku me Trump.
“Sapo e morëm përsëri Teksasin”
Mbështetësit e Talarico shpërthyen në festime në Austin, kryeqytetin e Teksasit, pasi rezultatet e projeksioneve zgjedhore e shpallën atë fitues.
Duke iu drejtuar simpatizantëve të mbledhur në festën e fitores, demokrati deklaroi: “Sapo e morëm përsëri Teksasin”.
“Ne sapo vërtetuam se të gjitha paratë e botës nuk janë të krahasueshme me njerëzit e Teksasit”, u shpreh ai, duke iu referuar shpenzimeve të mëdha të fushatës së rivalit të tij, e cila ishte mbështetur edhe nga miliarderi Elon Musk.
Talarico përdori gjithashtu referenca biblike për të përshkruar fitoren e tij, duke e krahasuar garën me historinë e Davidit dhe Goliathit.
“Kjo fitore është për çdo teksan që është pyetur ndonjëherë nëse dikush po dëgjon. Unë ju dëgjoj, ne ju dëgjojmë dhe sonte bota ju dëgjon”, deklaroi ai.
Fushata më e shtrenjtë për Senatin
Gara mes Talarico dhe Paxton u shndërrua në një prej përballjeve më të kushtueshme elektorale në historinë e Senatit amerikan, me shpenzime që kaluan gjysmë miliardi dollarë.
Miliarderi Elon Musk investoi rreth 158 milionë dollarë në një komitet politik që mbështeste fushatën e Paxton, ndërsa Talarico e përdori këtë fakt për të kritikuar ndikimin e miliarderëve në politikën amerikane.
Në një zhvillim të papritur, dy anëtarë të familjes Bush, një prej dinastive më të njohura politike republikane në SHBA, shprehën mbështetjen për Talarico.
Demokrati kishte arritur më parë të mposhtte kongresmenen Jasmine Crockett në zgjedhjet paraprake të partisë së tij, ndërsa gjatë fushatës u përball me reklama negative që kritikonin qëndrimet e tij për çështje sociale, përfshirë të drejtat e personave transgjinorë.
Skandalet e Paxton dhe pakënaqësia ndaj Trump
Analistët politikë e lidhin rezultatin edhe me polemikat që kanë shoqëruar karrierën e Ken Paxton. Në vitin 2023, ai u përball me një proces shkarkimi në parlamentin e Teksasit për akuza për korrupsion, por më vonë u lirua nga akuzat në procesin e zhvilluar në Senatin e shtetit.
Ai është përballur gjithashtu me procedura ligjore federale lidhur me akuza për mashtrim me letrat me vlerë, të cilat më pas u rrëzuan.
Profesori i shkencave politike në Universitetin George Washington, Quardricos Driskell, e cilësoi Paxton si një faktor të rëndësishëm në humbjen republikane, duke e përshkruar kandidaturën e tij si problematike.
Sipas tij, fitorja e Talarico dhe humbja e guvernatorit republikan Greg Abbott shënojnë një ndryshim historik në politikën e Teksasit.
Kostoja e jetesës dhe emigracioni ndikuan te votuesit
Pakënaqësia për çmimet e larta, veçanërisht për benzinën, si dhe politikat tarifore të Trump dhe lufta me Iranin, kanë qenë ndër çështjet kryesore që kanë ndikuar në klimën elektorale.
Një rol të rëndësishëm duket se kanë luajtur edhe votuesit hispanikë, të cilët përbëjnë rreth një të tretën e popullsisë së Teksasit.
Sondazhet e zhvilluara gjatë muajve të fundit të fushatës tregonin rënie të mbështetjes së këtij grupi për Trump dhe një orientim më të madh drejt kandidatëve demokratë.
Shumë votues hispanikë kishin shprehur pakënaqësi për politikat e ashpra të administratës ndaj emigracionit, përfshirë arrestimet dhe operacionet e autoriteteve federale.
Fitorja e Talarico, së bashku me rezultatet e tjera në Teksas, e kthen këtë shtet në një prej simboleve kryesore të ndryshimit politik në zgjedhjet e mesmandatit, duke vënë në pikëpyetje dominimin republikan që ka karakterizuar politikën e tij për dekada./BW
