Në takim u diskutua për bashkëpunimin parlamentar, sfidat e sigurisë në rajon, sulmin në Banjskë dhe synimin e Kosovës për anëtarësim në NATO.
Kryetarja e Kuvendit të Kosovës, Albulena Haxhiu, ka pritur një delegacion të Asamblesë Parlamentare të NATO-s, me të cilin ka diskutuar për thellimin e bashkëpunimit ndërinstitucional, avancimin e Kosovës drejt integrimit euroatlantik dhe zhvillimet aktuale të sigurisë në rajon dhe Evropë. Delegacioni u udhëhoq nga nënkryetari i Asamblesë Parlamentare të NATO-s, Alberto Losacco, dhe kryetari i Komisionit Politik, Sverre Myrli. Në takim morën pjesë edhe nënkryetari i Kuvendit, Ardian Gola, si dhe deputetet Shqipe Mehmeti-Selimi dhe Besa Kabashi-Ramaj. Sipas njoftimit të Kuvendit të Kosovës, Haxhiu vlerësoi rëndësinë e NATO-s për vendin dhe qytetarët e tij, duke rikujtuar ndërhyrjen e Aleancës në vitin 1999, të cilën e cilësoi vendimtare për përfundimin e luftës, masakrave dhe spastrimit etnik të kryer nga regjimi i atëhershëm serb. Ajo shprehu mirënjohjen për mbështetjen e vazhdueshme të NATO-s ndaj Kosovës, duke theksuar se vendi synon të dëshmojë gatishmërinë për të marrë përgjegjësi më të mëdha në shërbim të paqes dhe sigurisë së përbashkët.
Sulmi në Banjskë dhe sfidat e sigurisë në rajon
Një pjesë e rëndësishme e diskutimeve iu kushtua situatës politike dhe të sigurisë në Kosovë, me theks të veçantë te sulmi i armatosur në Banjskë dhe nevoja që përgjegjësit të përballen me drejtësinë.
Në takim u trajtuan edhe zhvillimet e sigurisë në Evropë, veçanërisht agresioni rus kundër Ukrainës. Me këtë rast, Haxhiu rikonfirmoi mbështetjen e Kosovës për popullin ukrainas.
Palët diskutuan gjithashtu për rreziqet që paraqesin dezinformimi dhe kërcënimet hibride, duke vënë në pah rëndësinë e bashkëpunimit ndërkombëtar për mbrojtjen e institucioneve demokratike, forcimin e besimit të qytetarëve dhe ruajtjen e stabilitetit rajonal.
Bashkëpunim më i thellë parlamentar me NATO-n
Gjatë takimit u diskutua edhe për mundësitë e zgjerimit të bashkëpunimit ndërmjet Kuvendit të Kosovës dhe Asamblesë Parlamentare të NATO-s.
Kuvendi i Kosovës ka statusin e anëtarit të asociuar në këtë Asamble që nga viti 2024. Ky status krijon mundësi për pjesëmarrje dhe bashkëpunim më të gjerë parlamentar në çështjet që lidhen me sigurinë dhe mbrojtjen.
Sipas njoftimit, palët shqyrtuan mundësitë për intensifikimin e kontakteve ndërmjet komisioneve parlamentare, shkëmbimin e përvojave dhe forcimin e mbikëqyrjes parlamentare në sektorin e mbrojtjes.
Vëmendje e veçantë iu kushtua edhe sigurisë së infrastrukturës kritike, si një element me rëndësi për qëndrueshmërinë institucionale dhe përballimin e sfidave të reja të sigurisë.
Kosova synon Partneritetin për Paqe dhe anëtarësimin në NATO
Në përfundim të takimit, Haxhiu ritheksoi përkushtimin e Kosovës për të avancuar drejt Partneritetit për Paqe dhe anëtarësimit në NATO, duke nënvizuar rëndësinë e reformave të brendshme dhe të mbështetjes nga vendet aleate. Forcimi i bashkëpunimit me institucionet parlamentare të Aleancës shihet si një mundësi për të zgjeruar komunikimin me partnerët ndërkombëtarë dhe për të thelluar njohuritë mbi standardet demokratike, mbikëqyrjen e sektorit të sigurisë dhe përgjegjësitë institucionale.
Takimi me delegacionin e Asamblesë Parlamentare të NATO-s vjen në kuadër të përpjekjeve të Kosovës për të konsoliduar partneritetet ndërkombëtare dhe për të avancuar objektivat e saj euroatlantike, në një kohë kur siguria dhe stabiliteti i rajonit mbeten çështje me rëndësi të veçantë për Evropën, transmeton rtk.
