Ardian Gjini është zgjedhur kryetar i ri i Aleancës për Ardhmërinë e Kosovës (AAK), në Kuvendin e 10-të Zgjedhor të partisë, duke shënuar një etapë të re në organizimin politik të subjektit.
Në fjalimin e tij pas zgjedhjes, Gjini falënderoi strukturat dhe anëtarësinë e AAK-së për besimin e dhënë, duke theksuar se forca e Aleancës buron nga bashkëpunimi, besimi i ndërsjellë dhe angazhimi i vazhdueshëm i anëtarëve të saj.
Ai tha se AAK hyn në një fazë të re politike, me synim forcimin e organizimit të brendshëm dhe përgatitjen për sfidat politike që e presin vendin në periudhën e ardhshme.
Kryetari aktual i partisë, Ramush Haradinaj, konfirmoi para delegatëve se po ia lë drejtimin e Aleancës Ardian Gjinit, duke shprehur mbështetje të plotë për të.
“Sot kryetar Ardian, unë dhe Aleanca besojmë tek ti. Besojmë që të jesh prijësi ynë, prijësi i Kosovës”, deklaroi Haradinaj.
Ai rikujtoi rrugëtimin e tij nga lufta çlirimtare deri te angazhimi politik, duke theksuar se shërbimi ndaj Kosovës nuk përfundon me largimin nga posti drejtues.
“Shërbimi për Kosovën nuk përfundon kurrë”, u shpreh Haradinaj.
Nga ana tjetër, Gjini e cilësoi Haradinajn si “simbol të Kosovës, simbol të lirisë dhe i politikës së mençur që ka ndodhur në Kosovë për më shumë se 30 vjet”, duke shtuar se historia e tij do të shkruhet “me shkronja të arta”.
Emocione pati edhe gjatë fjalimit të sekretarit të partisë, Besnik Tahiri, i cili tha se mesazhi i Haradinajt për hapjen e rrugës ndaj një gjenerate të re preku thellë delegatët dhe anëtarësinë e Aleancës.
Tahiri vlerësoi lart rolin historik të Haradinajt në proceset shtetformuese dhe në rrugëtimin politik të Kosovës, duke e cilësuar atë si një figurë me ndikim të veçantë në lirinë dhe ndërtimin e shtetit.
Kuvendi i AAK-së pritet të formalizojë zgjedhjen e Ardian Gjinit në krye të partisë, ndërsa ai pritet të udhëheqë edhe listën zgjedhore të Aleancës në zgjedhjet e ardhshme, transmeton rtk.
